நீதிமன்ற அவமதிப்புக் குற்றத்திற்காக இதற்கு முன்னரும் சிறைத்தண்டனை பெற்றிருந்தபோதிலும், சிறைக்குள்ளோ அல்லது வெளியிலோ எந்தவொரு சந்தர்ப்பத்திலும் தனது காவி உடையைக் கழற்றியதில்லை என கலபொடஅத்தே ஞானசார தேரர் தெரிவித்துள்ளார்.
ஜனாதிபதியின் பொதுமன்னிப்பு ரத்துச் செய்யப்பட்டதைத் தொடர்ந்து, தற்போது சிறையில் அடைக்கப்பட்டுள்ள ஞானசார தேரரைச் சந்திப்பதற்காக மெகசின் சிறைச்சாலைக்குச் சென்றபோது அவர் இதனைத் தெரிவித்ததாக சட்டத்தரணி சூலா அதிகாரி குறிப்பிட்டுள்ளார்.
இதன்போது, தனது காவி உடையைக் கழற்றுவதற்காகச் சிறைச்சாலை அதிகாரிகளுடன் இரண்டு மணி நேரத்திற்கும் மேலாகப் போராடியதாகவும், இறுதியில் கழற்றப்பட்ட காவி உடை சிறைச்சாலையின் மேற்கூரையில் இருந்த மின்விசிறி ஒன்றில் தொங்கியதாகவும் ஞானசார தேரர் கூறியதாகத் தெரிவிக்கப்படுகிறது.
மேலும், தனது காவி உடை கழற்றப்படும் நடவடிக்கையை யாரோ ஒருவர் தொலைபேசி ஊடாகப் பார்த்ததாகவும், காவி உடையைக் கழற்றுவதன் மூலம் பௌத்தர்கள் மற்றும் மகா சங்கத்தினர் மீதான பகையைத் தீர்த்துக்கொள்ளச் சிலர் விரும்பியதாகவும் அவர் குற்றஞ்சாட்டியுள்ளார்.
அத்துடன், உபசம்பதா பெற்ற பிக்குவான தான் மீண்டும் காவி உடையை அணிய வேண்டுமாயின், அது தனது நிக்காயவின் உரிய சடங்குகள் மற்றும் நடைமுறைகளுக்கு அமையவே மேற்கொள்ளப்பட வேண்டும் எனவும் ஞானசார தேரர் தெரிவித்துள்ளார்.
தனது நிக்காயவின் நடைமுறைகளுக்கு அமைய மட்டுமே மீண்டும் காவி உடையை அணிவேன் என்றும், வேறு எவரின் மூலமாகவும் அதனை அணியப்போவதில்லை என்றும் அவர் மேலும் கூறியதாக சட்டத்தரணி சூலா அதிகாரி ஊடாக வெளியாகியுள்ள தகவல்கள் தெரிவிக்கின்றன.
