அஹுங்கல்ல பொலிஸ் நிலையத்தில் கடமையாற்றும் பொலிஸ் கான்ஸ்டபிள் ஒருவர், உத்தியோகபூர்வ மோட்டார் சைக்கிளின் ஆசனத்திற்குக் கீழே மறைந்திருந்த நல்லபாம்பு தீண்டியதில் வைத்தியசாலையில் அனுமதிக்கப்பட்ட சம்பவம் பதிவாகியுள்ளது.
கடந்த ஒக்டோபர் 16ஆம் திகதி, அஹுங்கல்ல நகரில் போக்குவரத்துக் கடமைகளை நிறைவு செய்த குறித்த கான்ஸ்டபிள், பொலிஸ் சார்ஜன்ட் ஒருவரால் செலுத்தப்பட்ட உத்தியோகபூர்வ மோட்டார் சைக்கிளில் பின்னால் அமர்ந்து பொலிஸ் நிலையம் நோக்கிப் பயணித்துள்ளார்.
இதன்போது, மோட்டார் சைக்கிளின் ஆசனத்திற்குக் கீழே ஏற்கனவே மறைந்திருந்த நல்லபாம்பு திடீரென அவரைத் தீண்டியுள்ளது.
இதனையடுத்து, குறித்த பாம்பு உயிருடன் பிடிக்கப்பட்டதுடன், பாம்புத் தீண்டலுக்கு உள்ளான கான்ஸ்டபிள் உடனடியாகப் பலப்பிட்டிய ஆதார வைத்தியசாலையில் அனுமதிக்கப்பட்டு அவசர சிகிச்சைக்கு உட்படுத்தப்பட்டார்.
சிகிச்சைகளின் பின்னர் அவர் பூரண குணமடைந்து ஒக்டோபர் 17ஆம் திகதி வைத்தியசாலையிலிருந்து வெளியேறியுள்ளதாக வைத்தியசாலை வட்டாரங்கள் தெரிவித்துள்ளன.
