நீதிமன்றத்தில் ஆஜராகத் தவறிய முன்னாள் இராஜாங்க அமைச்சர் பிரேமலால் ஜயசேகரவைக் கைது செய்து நீதிமன்றத்தில் ஆஜர்படுத்துமாறு உத்தரவிட்டு, உயர்நீதிமன்றம் இன்று (21) திறந்த பிடியாணை பிறப்பித்துள்ளது.
குற்றப் புலனாய்வுத் திணைக்களத்தின் பணிப்பாளர் ஊடாகக் குறித்த பிடியாணையைப் பிறப்பிக்குமாறு உத்தரவிட்ட நீதிமன்றம், அதனை விரைவாகச் செயற்படுத்துவதற்குத் தேவையான அனைத்து நடவடிக்கைகளையும் எடுக்குமாறு பொலிஸ்மா அதிபருக்கும் அறிவுறுத்தியுள்ளது.
இதேவேளை, இன்று நீதிமன்றத்தில் ஆஜரான ஏனைய இரு பிரதிவாதிகளையும் விளக்கமறியலில் வைக்குமாறு நீதிமன்றம் உத்தரவிட்டுள்ளது.
2015ஆம் ஆண்டு ஜனாதிபதித் தேர்தல் காலத்தில், அப்போதைய ஜனாதிபதி வேட்பாளர் மைத்திரிபால சிறிசேனவின் கஹவத்தை பகுதியில் நடைபெற்ற பிரசாரக் கூட்டத்தின் மீது துப்பாக்கிச் சூடு நடத்தி ஒருவரைக் கொலை செய்த குற்றச்சாட்டில், பிரேமலால் ஜயசேகர உள்ளிட்ட மூவருக்கு இரத்தினபுரி மேல் நீதிமன்றம் மரண தண்டனை விதித்திருந்தது.
எனினும், அந்தத் தீர்ப்புக்கு எதிராகத் தாக்கல் செய்யப்பட்ட மேன்முறையீட்டை விசாரித்த மேன்முறையீட்டு நீதிமன்றம், பின்னர் மூவரையும் விடுதலை செய்து தீர்ப்பளித்தது.
இந்தத் தீர்ப்புக்கு எதிராகப் பாதிக்கப்பட்ட தரப்பினரால் உயர்நீதிமன்றத்தில் மேன்முறையீட்டு மனு தாக்கல் செய்யப்பட்டது. அதன் விசாரணைகள் கடந்த செப்டம்பர் 4ஆம் திகதி நிறைவடைந்த நிலையில், பிரதிவாதிகள் மூவரையும் இன்று நீதிமன்றத்தில் ஆஜராகுமாறு உயர்நீதிமன்றம் அழைப்பாணை பிறப்பித்திருந்தது.
இந்நிலையில், வழக்கு இன்று விசாரணைக்கு எடுத்துக்கொள்ளப்பட்டபோது பிரேமலால் ஜயசேகர நீதிமன்றத்தில் ஆஜராகவில்லை. அவர் வெளிநாடு சென்றுள்ளதாகச் சட்டமா அதிபர் சார்பில் ஆஜரான பிரதி சொலிசிட்டர் ஜெனரல் ஜனக பண்டார நீதிமன்றத்தில் தெரிவித்துள்ளார்.
இதனையடுத்து, முன்வைக்கப்பட்ட சமர்ப்பணங்களைப் பரிசீலித்த பிரதம நீதியரசர் பிரீதி பத்மன் சூரசேன, நீதியரசர்களான அச்சல வெங்கப்புலி மற்றும் கிஹான் குலதுங்க ஆகியோர் அடங்கிய மூவர் கொண்ட நீதியரசர்கள் குழாம், பிரேமலால் ஜயசேகரவைக் கைது செய்து நீதிமன்றத்தில் ஆஜர்படுத்துவதற்கான திறந்த பிடியாணையைப் பிறப்பிக்க உத்தரவிட்டுள்ளது.
