இத்தாலியில் வன்முறைப் போராட்டங்களைக் கட்டுப்படுத்தும் நோக்கில், ஐந்து அல்லது அதற்கு மேற்பட்டோர் அடங்கிய குழுவில் இணைந்து கற்கள், பட்டாசுகள் அல்லது குச்சிகளை வீசி பொதுப் பாதுகாப்புக்கு அச்சுறுத்தல் ஏற்படுத்துவோருக்கு ஐந்து ஆண்டுகள் வரை சிறைத்தண்டனையும், 20,000 யூரோ வரை அபராதமும் விதிக்கக்கூடிய புதிய பாதுகாப்பு நடவடிக்கைகளை அந்நாட்டு அரசாங்கம் அறிவித்துள்ளது.
இத்தாலிப் பிரதமர் ஜியோர்ஜியா மெலோனி, அமைச்சரவைக் கூட்டத்துக்குப் பின்னர் ஒக்டோபர் 20ஆம் திகதி வெளியிட்ட காணொளியில் இந்த அறிவிப்பை வெளியிட்டார்.
போராட்டங்களின்போது முகத்தை மறைத்துக்கொண்டு வன்முறையில் ஈடுபடுவோர் அல்லது பிறருக்குக் காயம் ஏற்படுத்துவோருக்கு மேலதிக தண்டனைகள் விதிக்கப்படலாம் எனவும், குழுவாகச் சொத்துக்களைச் சேதப்படுத்துவோருக்கு எதிரான தண்டனைகளும் அதிகரிக்கப்படும் எனவும் தெரிவிக்கப்பட்டுள்ளது.
மேலும், பொதுச் சொத்துக்களுக்குச் சேதம் விளைவிப்போர் அதற்கான இழப்பீட்டைச் செலுத்த வேண்டியிருக்கும். தனியார் சொத்துக்களுக்கு ஏற்படும் சேதங்களுக்கும் சட்ட நடைமுறைகள் மூலம் இழப்பீடு கோர முடியும்.
குற்றத்தில் ஈடுபடுபவர் சிறுவராக இருந்தால், அவரால் ஏற்படுத்தப்பட்ட சேதங்களுக்கு பெற்றோர்களைப் பொறுப்பேற்கச் செய்யும் ஏற்பாடுகளும் புதிய நடவடிக்கைகளில் உள்ளடக்கப்பட்டுள்ளன.
மிலான் உள்ளிட்ட நகரங்களில் அண்மையில் இடம்பெற்ற வன்முறைச் சம்பவங்கள் மற்றும் சொத்துச் சேதங்களைத் தொடர்ந்து இந்த நடவடிக்கைகள் அறிவிக்கப்பட்டுள்ளன.
எனினும், இந்த அறிவிப்பு அமைதியான போராட்டங்களுக்குத் தடை விதிப்பதாகப் பொருள்படாது. வன்முறையில் ஈடுபடுவோரைக் குறிவைக்கும் வகையில் புதிய குற்றவியல் ஏற்பாடு அறிமுகப்படுத்தப்பட்டுள்ளதாகச் செய்திகள் தெரிவிக்கின்றன. புதிய ஆணையைச் சட்டமாகத் தொடர்ந்து அமுல்படுத்துவதற்கு நாடாளுமன்றத்தின் ஒப்புதல் பெறப்பட வேண்டிய நடைமுறையும் உள்ளது.
