நாட்டில் எரிவாயு தட்டுப்பாடு எதுவும் இல்லை எனவும், சில தரப்பினர் தேவையற்ற பொதுமக்கள் அச்சத்தை ஏற்படுத்த முயற்சிப்பதாகவும் நிதி மற்றும் திட்டமிடல் பிரதி அமைச்சர் கலாநிதி அனில் ஜயந்த பெர்னாண்டோ தெரிவித்துள்ளார்.
ஒக்டோபர் 21ஆம் திகதி புதன்கிழமை நாடாளுமன்றத்தில் உரையாற்றிய அவர், மத்திய கிழக்கு மோதல் நிலைமையுடன் தொடர்புடைய இடையூறுகள் காரணமாக எரிவாயுக் கப்பல் வருகையில் ஒன்று அல்லது இரண்டு நாட்கள் ஏற்பட்ட தற்காலிக தாமதமே அண்மைய விநியோகத் தாமதங்களுக்குக் காரணம் எனக் குறிப்பிட்டார்.
நாட்டில் போதுமான எரிவாயு கையிருப்பு உள்ளதாகத் தெரிவித்த அவர், வழமையாக நாளொன்றுக்கு 80,000 எரிவாயு சிலிண்டர்கள் விநியோகிக்கப்படும் நிலையில், தற்போது மக்களின் தேவையைப் பூர்த்தி செய்வதற்காக லிட்ரோ நிறுவனம் நாளொன்றுக்கு 100,000 சிலிண்டர்களை விநியோகித்து வருவதாகவும் தெரிவித்தார்.
மேலும், நாட்டுக்குத் தேவையான எரிபொருள் மற்றும் அத்தியாவசியப் பொருட்களின் கையிருப்புகளும் போதுமான அளவில் பாதுகாப்பாக உள்ளதாக அவர் உறுதியளித்தார்.
