தீர்க்கப்படாத பல்வேறு கோரிக்கைகளை முன்வைத்து, எதிர்வரும் நவம்பர் 9ஆம் திகதி நாடளாவிய ரீதியில் வேலைநிறுத்தப் போராட்டத்தை முன்னெடுக்கவுள்ளதாக ஒன்றிணைந்த அபிவிருத்தி உத்தியோகத்தர்கள் மத்திய நிலையம் அறிவித்துள்ளது.
தமது பிரச்சினைகள் தொடர்பில் அதிகாரிகளுக்குப் பலமுறை அறிவித்தும் இதுவரை திருப்திகரமான தீர்வுகள் வழங்கப்படவில்லை என அதன் பொதுச் செயலாளர் தம்மிக்க முனசிங்க தெரிவித்துள்ளார்.
அபிவிருத்தி உத்தியோகத்தர்கள் எதிர்கொள்ளும் பிரச்சினைகளைத் தீர்ப்பதாக உறுதியளித்தே தற்போதைய அரசாங்கம் ஆட்சிக்கு வந்தபோதிலும், நீண்டகாலமாக நிலவி வரும் பல பிரச்சினைகள் இன்னமும் தீர்க்கப்படவில்லை என அவர் சுட்டிக்காட்டியுள்ளார்.
அபிவிருத்தி உத்தியோகத்தர்களுக்கான தெளிவான கடமைகளின் பட்டியல் மற்றும் முறையான பதவி உயர்வுத் திட்டம் இல்லாமை, தரங்களுக்கிடையிலான பதவி உயர்வுக்கு 10 ஆண்டுகள் காத்திருக்க வேண்டிய நிலை, உயர் தரமொன்று இல்லாமை, ஓராண்டுப் பயிற்சிக்குப் பின்னரும் நிரந்தர சேவையில் உள்வாங்கப்படாமை மற்றும் சம்பள முரண்பாடுகள் உள்ளிட்ட பிரச்சினைகள் தொடர்வதாக அவர் தெரிவித்துள்ளார்.
இந்தப் பிரச்சினைகளுக்குத் தீர்வு காண அதிகாரிகளுக்கு அழுத்தம் கொடுக்கும் நோக்கில், நவம்பர் 9ஆம் திகதி நாடளாவிய வேலைநிறுத்தப் போராட்டம் முன்னெடுக்கப்படவுள்ளதாக ஒன்றிணைந்த அபிவிருத்தி உத்தியோகத்தர்கள் மத்திய நிலையம் குறிப்பிட்டுள்ளது.
