மருத்துவமனையில் சிகிச்சை பெற்று வரும் முன்னாள் ஜனாதிபதி மகிந்த ராஜபக்ஷ, விளக்கமறியலில் வைக்கப்பட்டுள்ள தனது மகனும் நாடாளுமன்ற உறுப்பினருமான நாமல் ராஜபக்ஷவுக்கு முக்கிய விடயங்களை உள்ளடக்கிய கடிதமொன்றை அனுப்பியுள்ளதாகத் தகவல்கள் வெளியாகியுள்ளன.
மகிந்த ராஜபக்ஷவின் செயலாளர் ஒருவரால் எழுதப்பட்டதாகக் கூறப்படும் இந்தக் கடிதத்தின் முழுமையான உள்ளடக்கங்கள் இதுவரை ஊடகங்களிடம் வெளியிடப்படவில்லை.
எனினும், குறித்த கடிதத்தில் நீதிமன்றத்தின் மீது நம்பிக்கை வைத்து செயற்படுமாறு நாமலுக்கு மகிந்த ராஜபக்ஷ அறிவுறுத்தியுள்ளதாகத் தெரிவிக்கப்படுகிறது.
2010ஆம் ஆண்டு நாமல் ராஜபக்ஷ அரசியலில் பிரவேசித்த காலப்பகுதியை நினைவுகூர்ந்துள்ள மகிந்த ராஜபக்ஷ, சிறைத்தண்டனை உள்ளிட்ட சவால்களையும் துன்பங்களையும் எதிர்கொள்ளத் தயாராக இருந்தால் மட்டுமே அரசியலில் ஈடுபட அனுமதித்ததாகக் கடிதத்தில் குறிப்பிட்டுள்ளதாகத் தகவல்கள் தெரிவிக்கின்றன.
அத்துடன், தனது அரசியல் வாழ்க்கையின் ஆரம்பகாலத்திலும் ஆதாரமற்ற குற்றச்சாட்டொன்றின் அடிப்படையில் சிறைவாசத்தை எதிர்கொண்டதாக அவர் நினைவுபடுத்தியுள்ளதாகவும் கூறப்படுகிறது.
தற்போது தாமும் தனது மனைவி ஷிரந்தி ராஜபக்ஷவும் நவலோக மருத்துவமனையில் சிகிச்சை பெற்று வருவதாகவும், தமது மகன்களான யோஷித மற்றும் ரோஹித ஆகியோர் தங்களது நலன்களைக் கவனித்து வருவதாகவும் அந்தக் கடிதத்தில் குறிப்பிடப்பட்டுள்ளதாகத் தெரிவிக்கப்படுகிறது.
ஸ்ரீலங்கா பொதுஜன பெரமுனவின் நாடாளுமன்ற உறுப்பினர் டி.வி. சானக, நாமல் ராஜபக்ஷ நாடாளுமன்றத்திற்கு வருகை தந்திருந்தபோது அவரிடம் குறித்த கடிதத்தைக் கையளித்ததாகவும் செய்தித் தகவல்கள் தெரிவிக்கின்றன.
எனினும், கடிதத்தின் முழுமையான உள்ளடக்கங்கள் உத்தியோகபூர்வமாக வெளியாகாத நிலையில், அதில் குறிப்பிடப்பட்டுள்ள விடயங்கள் தொடர்பான மேலதிக தகவல்கள் எதிர்பார்க்கப்படுகின்றன.
