மட்டக்களப்பு காந்திபூங்காவில் இன்று (16) அமைதி வழி போராட்டம் ஒன்று இடம் பெற்றிருந்தது.
இஸ்ரேல் மற்றும் பாலஸ்தீன் நாடுகளுக்கு இடையே நடைபெற்று கொண்டிருக்கும் மோதலை முடிவுக்கு கொண்டு வருவது மட்டுமல்லாமல், அப்பகுதியில் அமைதியை நிலை நாட்டுமாறு கோரியும் இக் கவன ஈர்ப்பு போராட்டம் முன்னெடுக்கப்பட்டது.
அகில இலங்கை கிறிஸ்தவ காங்கிரஸ் அமைப்பினால் ஏற்பாடு செய்யப்பட்ட இந்த அமைதி வழி போராட்டம், மட்டக்களப்பு காந்தி பூங்காவிலுள்ள ஊடகவியலாளர்கள் நினைவுத்தூபிக்கு முன்பாக இடம் பெற்றிருந்ததுடன், இதில் கலந்து கொண்ட அகில இலங்கை கிறிஸ்தவ காங்கிரஸின் மட்டக்களப்பு சங்க தலைவர் கருத்து தெரிவிக்கையில்.
இஸ்ரேல்,பாலஸ்தீன் மோதல் காரணமாக தொடர்ந்து பல்லாயிரக்கணக்கான மக்கள் இறக்கும் நிலை ஏற்பட்டுள்ளது.இந்த நிலைமை மூன்றாம் உலக மகா யுத்தத்தை ஏற்படுத்தாத வண்ணம் முற்றாக போரை முடிவுக்கு கொண்டு வர சர்வதேச சமூகம் முன்வரவேண்டும். அத்தோடு இனம்,மதம்,மொழி ஒற்றுமையினை சர்வதேச நாடுகள் உருவாக்கவேண்டும்,சர்வதேச நாடுகள் இந்த இரு நாடுகளுக்கும் ஆயுதங்கள் வழங்குவதை விடுத்து யுத்ததினை முடிவுக்கு கொண்டுவருவதற்கான நடவடிக்கையினை முன்னெடுக்கவேண்டும் என்றும் தெரிவித்திருந்தார்.
