மட்டக்களப்பு மாவட்டத்தின் வாழைச்சேனை, வாகரை, ஆரையம்பதி மற்றும் செங்கலடிப் பிரதேசங்களில் முன்னெடுக்கப்பட வேண்டிய அபிவிருத்தித் திட்டங்கள் தொடர்பான கலந்துரையாடல், மட்டக்களப்பு மாவட்ட உள்ளூராட்சிமன்ற செயலாளர்களுக்கும் மட்டக்களப்பு மாவட்ட ஒருங்கிணைப்புக் குழுத் தலைவரும் இராஜாங்க அமைச்சருமான சிவநேசதுரை சந்திரகாந்தனுக்கும் இடையில் கடந்த சனிக்கிழமை (01) நடைபெற்றது.
மட்டக்களப்பு மாவட்ட செயலகத்தின் மாவட்ட ஒருங்கிணைப்புக்குழுத் தலைவரின் அலுவலகத்தில் நடைபெற்ற இந்தக் கலந்துரையாடலின் போது உள்ளூராட்சிமன்ற உதவி ஆணையாளர் எஸ்.பிரகாஸ், வாழைச்சேனை, வாகரை, ஆரையம்பதி மற்றும் செங்கலடிப் பிரதேச சபைகளின் செயலாளர்கள் கலந்துகொண்டனர். இதன்போது, சந்திவெளி – திகிலிவெட்டைக்கு இடையிலான படகுப்பாதையில் ஏற்பட்டுள்ள தடங்கல் தொடர்பாகவும் கவனம் செலுத்தப்பட்டது. இந்நிலையில், பயணிகளின் நலன் கருதி எதிர்வரும் இரண்டு வாரங்களுக்குள் அப்படகுப்பாதையை திருத்தியமைத்து பயணிகளின் பாவனைக்குகையளிக்க வேண்டியதன் அவசியத்தை உரிய அதிகாரிகளுக்கு இராஜாங்க அமைச்சர் தெளிவுபடுத்தினார்.
மேலும், போக்குவரத்து வசதியின்றியுள்ள கிராமங்களைச் சேர்ந்த மக்களின் நலன் கருதி விசேட பஸ் சேவையைஏற்படுத்திக் கொடுக்குமாறு மட்டக்களப்பு மற்றும் வாழைச்சேனை போக்குவரத்துச் சபைகளின் அதிகாரிகளுக்கு இராஜாங்க அமைச்சர் ஆலோசனை வழங்கியுள்ளார். இவ்வாறாக போக்குவரத்து வசதிகளை ஏற்படுத்திக்கொடுப்பதனால் பாடசாலை மாணவர்கள், ஆசிரியர்கள் மற்றும் அரச உத்தியோகத்தர்கள் உட்பட பயணிகள் நன்மை அடைய முடியுமென, இராஜாங்க அமைச்சர் தெரிவித்தார்.
