கராப்பிட்டிய வைத்தியசாலையில் இடம்பெற்ற சம்பவம் ஒன்று தொடர்பில் விசேட வைத்தியர்கள் சங்கத்தின் கராப்பிட்டி கிளை அறிக்கை ஒன்றை வெளியிட்டுள்ளது.
கடந்த 16ஆம் திகதி விசேட வைத்திய நிபுணர் வைத்தியர் கிரிஷாந்த பெரேராவினால் மேற்கொள்ளப்பட்ட சத்திரசிகிச்சைக்கு அன்றைய தினம் சுகாதார ஊழியர்களின் பணிப்புறக்கணிப்பினால் இடையூறு ஏற்பட்டிருந்ததாக சங்கம் சுட்டிக்காட்டியுள்ளது.
இது தொடர்பில் வைத்திய நிபுணர் கிரிஷாந்த பெரேரா உரிய பிரிவுக்கு அறிவித்திருந்ததாக அந்த அறிக்கையில் குறிப்பிடப்பட்டுள்ளது.
இதற்கு எதிராக கடந்த 17ஆம் திகதி சுகாதார பணியாளர்கள் குழுவொன்று வைத்தியர் கிரிஷாந்த பெரேராவை அச்சுறுத்தியதுடன், அந்த குழுவினர் தொடர்ச்சியாக உயிரச்சுறுத்தல் விடுத்துள்ளதாகவும் விசேட வைத்தியர்கள் சங்கம் விடுத்துள்ள அறிக்கையில் தெரிவிக்கப்பட்டுள்ளது.
இவ்விடயம் தொடர்பில் பக்கச்சார்பற்ற விசாரணைகளை மேற்கொள்ளுமாறு சம்பந்தப்பட்ட அதிகாரிகளிடம் கோரிக்கை விடுப்பதாகவும் அந்த அறிக்கையில் மேலும் தெரிவிக்கப்பட்டுள்ளது.
