மட்டக்களப்பு புனித மிக்கேல் தேசிய பாடசாலையின் வருடாந்த இல்ல விளையாட்டுப் போட்டி பாடசாலையின் அதிபர் அன்ரன் பெனடிக் ஜோசப் தலைமையில் வெபர் மைதானத்தில் நேற்று (06) திகதி இடம் பெற்றது.
பாடசாலை மாணவர்களின் பாண்டு வாத்திய இசை முழங்க அதிதிகள் வரவேற்கப்பட்டதனைத் தொடர்ந்து, தேசிய கொடி ஏற்றப்பட்டு, தேசிய கீதம் இசைக்கப்பட்டதனைத் தொடர்ந்து இல்ல விளையாட்டுப் போட்டி நிகழ்வுகள் ஆரம்பமாகியது.
இந் நிகழ்வில் மட்டக்களப்பு மறை மாவட்ட ஆயர் யோசப் பொன்னையா ஆண்டகை கலந்து கொண்டு சிறப்பித்ததுடன், நிகழ்விற்கு பிரதம அதிதியாக மட்டக்களப்பு மாவட்ட அரசாங்க அதிபர் திருமதி ஜஸ்டினா முரளிதரன் கலந்து கொண்டார்.
இதன் போது பிரதம அதிதிகளுக்கு மாணவர்களின் அணிவகுப்பு மரியாதை செலுத்தப்பட்டதனைத் தொடர்ந்து, விளையாட்டு நிகழ்வுகள் இடம் பெற்றன.
அதிதிகளுக்கு நினைவுப் பரிசில்கள் வழங்கி வைக்கப்பட்டதுடன் போட்டியில் வெற்றியிட்டிய மாணவர்களுக்கும் இல்லங்களுக்கும் வெற்றிக் கிண்ணங்களும் சான்றிதழ்களும் அதிதிகளினால் வழங்கி வைக்கப்பட்டது.
இவ் வருட இல்ல விளையாட்டுப் போட்டியில் முதலாம் இடத்தினை மரியன் இல்லமும் இரண்டாம் இடத்தை மில்லர் இல்லமும் மூன்றாம் இடத்தை வேணல் இல்லமும் நான்காவது இடத்தை கிரவுதர் இல்லமும் பெற்றுக் கொண்டது.
இந் நிகழ்வின் பழைய மாணவர்கள் சங்கத்தின் தலைவர் இயேசு சபை துறவிகளின் மேலாளர் அருட்தந்தை சகாயநாதன் அடிகளார், அருட்தந்தை போல் சற்குணநாயகம் அடிகளார் விசேட அதிதியாக பிரதி கல்வி பணிப்பாளர் திருமதி சி.சுபாகரன் மற்றும் 243 இராணுவ படைப்பிரிவின் கட்டளைத் தளபதி பிரிகேடியர் சன்டிம குமாரசிங்க ஆகியோர் கலந்து கொண்டதுடன் சிறப்பு விருந்தினராக உடற்கல்வி பிரதி பணிப்பாளர் வி.லவக்குமார், குட்செப்பட் பாடசாலையின் அதிபர் விரயன் சரவணமுத்து, பாடசாலையின் பிரதி அதிபர்கள், ஆசிரியர்கள், பழைய மாணவர்கள் சங்க பொது செயலாளர் கு.சகாந்தன், பெற்றோர்கள் என பலர் கலந்து கொண்டனர்.
