இலங்கையின் பிரதமர் தினேஷ் குணவர்த்தனவின் தாய்லாந்து பயணம் காரணமாக, மேற்கு அவுஸ்திரேலியாவின் தேரவாத பௌத்த பிக்குவான வணக்கத்துக்குரிய அஜான் பிரம்மவன்ச தேரர், கட்டுநாயக்க விமான நிலையத்தில் 12 மணிநேரம் காத்திருக்கவேண்டிய நிலை ஏற்பட்டுள்ளது.
இந்த சம்பவம், கடந்த (30.05.2023) அன்று இடம்பெற்றுள்ளதாக நேற்றைய தினம் (01.06.2023) ஊடகம் ஒன்று செய்தி வெளியிட்டுள்ளது.
வணக்கத்துக்குரிய தேரர் சிங்கப்பூர் எயார்லைன்ஸ் ஊடாக பேங்கொக் செல்வதற்காக பண்டாரநாயக்க சர்வதேச விமான நிலையத்தை இரவு 10 மணிக்குச் சென்றடைந்து அங்கு முக்கிய பிரமுகர் செல்லும் பகுதியில் காத்திருந்துள்ளனர்.
இதன்போது, பிரதமர் தினேஷ் குணவர்தனவும் சில அமைச்சர்களும் அதே விமானத்தில் தாய்லாந்து செல்வதற்காக சம்பவத்தினமான இரவு 12 மணிக்கு விமான நிலையத்துக்குச் சென்றுள்ளனர்.
இந்தநிலையில், பிரதமர் மற்றும் தூதுக்குழுவினர் விமானத்தில் ஏறுவதற்காக அதிகாலை 2.30 அளவில் சிறப்பு பேருந்தில் அழைத்துச் செல்லப்பட்டுள்ளனர்.
எனினும் ஓய்வறையில் இருந்த வணக்கத்துக்குரிய பிரம்மவன்சோ தேரரின் பயணம் ரத்து செய்யப்பட்டுள்ளதாகத் தெரிவிக்கப்பட்டுள்ளது. இதனையடுத்து அவர் காலை 7 மணியளவில் விமானம் ஒன்றில் அனுப்பப்படவிருந்தபோதும், அதுவும் இரத்துச்செய்யப்பட்டுள்ளது.
அத்துடன் மறுநாள் முற்பகல் 10.45க்கு மலேசியாவின் கோலாலம்பூருக்குப் புறப்பட்ட ஸ்ரீலங்கன் விமானத்தில் தேரர் அனுப்பப்பட்டுள்ளார். இதேவேளை இந்த சம்பவம் தொடர்பாக சிறிலங்கன் எயார்லைன்ஸ் அறிக்கை ஒன்றை வெளியிட்டுள்ளது.
அதில், தேரர் முதலில் பேங்காக் அல்லது வேறு எந்த இடம் ஒன்றுக்காகச் செல்வதற்கு, ஸ்ரீலங்கன் எயார்லைன்ஸில் முன்பதிவு செய்யப்படவில்லை, மாறாக வேறு ஒரு விமானத்திலேயே முன்பதிவு செய்திருந்தார் என்று சிறிலங்கன் எயார்லைன்ஸ் குறிப்பிட்டுள்ளது.
2023 மே 31ஆம் திகதி அதிகாலை பண்டாரநாயக்கா சர்வதேச விமான நிலையத்தில் துரதிர்ஷ்டவசமான தாமதம் ஏற்பட்டபோது, உடனடியாக செயற்பட்டு, மாற்று விமானத்துக்கான உதவியை வழங்கியதாகவும் சிறிலங்கன் எயார்லைன்ஸ் தமது அறிக்கையில் குறிப்பிட்டுள்ளது.
