இலங்கை திறைசேரியில் இடம்பெற்ற 2.5 மில்லியன் அமெரிக்க டொலர் மதிப்பிலான சைபர் மோசடி வழக்குடன் தொடர்புடைய முக்கிய அதிகாரி ஒருவர் மர்மமான முறையில் உயிரிழந்துள்ளார்.
வெளிநாட்டு வளங்கள் திணைக்களத்தின் பணிப்பாளராக இருந்த ரங்க ராஜபக்ஷ, இந்த மோசடி சம்பவம் குறித்து முதலில் குற்றவியல் புலனாய்வு திணைக்களத்தில் (CID) புகார் அளித்தவர் என்பதும் குறிப்பிடத்தக்கது.
ஆஸ்திரேலியாவிற்கு செலுத்தப்பட வேண்டிய 22.9 மில்லியன் டொலர் கடன் தொகையில் இருந்து 2.5 மில்லியன் டொலர் தவறான வங்கிக் கணக்கிற்கு மாற்றப்பட்டதாக குற்றச்சாட்டு முன்வைக்கப்பட்டுள்ளது.
இந்த வழக்கில் முக்கிய சாட்சியாக கருதப்பட்ட ரங்க ராஜபக்ஷ, அரச நிதி அமைப்பின் பாதுகாப்பு குறைபாடுகள் மற்றும் பண பரிமாற்ற செயல்முறைகள் தொடர்பாக முக்கிய தகவல்களை வைத்திருந்ததாக தெரிவிக்கப்படுகிறது. எனினும், அவர் பணியாற்றிய திணைக்களமும் விசாரணைக்கு உட்பட்டதால், அவர் பணியில் இருந்து இடைநிறுத்தப்பட்டிருந்தார்.
இவரின் திடீர் மரணம் இயற்கையானதா அல்லது வேறு சந்தேகத்திற்கிடமான சூழ்நிலைகளில் ஏற்பட்டதா என்பதை தெளிவுபடுத்த காவல்துறையினர் விசாரணைகளை தொடங்கியுள்ளனர். மேலும், அவர் CID-இல் வழங்கிய வாக்குமூலங்களும் அவரிடம் இருந்த முக்கிய ஆவணங்களும் பாதுகாப்பாக உள்ளனவா என்பது தொடர்பாகவும் கவனம் செலுத்தப்படுகிறது.
இந்த மரணம், மோசடி வழக்கின் விசாரணைக்கு எந்த அளவு தாக்கத்தை ஏற்படுத்தும் என்பது குறித்து சந்தேகங்கள் எழுந்துள்ளன. உண்மை வெளிச்சத்துக்கு வர வேண்டும் என்பதே பொதுமக்களின் எதிர்பார்ப்பாக உள்ளது.
