வெனிசுலாவை அமெரிக்கக் கொடியுடன் இணைத்து, அமெரிக்காவின் “51ஆவது மாநிலம்” என சித்தரிக்கும் வரைபடம் ஒன்றை அமெரிக்க ஜனாதிபதி டொனால்ட் ட்ரம்ப் வெளியிட்டுள்ளார்.
தனது சமூக வலைத்தள கணக்கின் ஊடாக அவர் இந்த வரைபடத்தை பகிர்ந்துள்ளதாக சர்வதேச ஊடகங்கள் செய்தி வெளியிட்டுள்ளன.
சீனாவிற்கான பயணத்தை மேற்கொண்டுள்ள நிலையிலேயே ட்ரம்ப் வெளியிட்டுள்ள இந்த சர்ச்சைக்குரிய பதிவு உலகளவில் பெரும் கவனத்தை ஈர்த்துள்ளது.
வெனிசுலாவின் இடைக்கால ஜனாதிபதி டெல்சி ரோட்ரிக்ஸ், தமது நாடு அமெரிக்காவின் 51ஆவது மாநிலமாக மாறுவது குறித்து எந்தவொரு சூழலிலும் பரிசீலிக்கப்படவில்லை என தெரிவித்திருந்த நிலையில், அதற்கு அடுத்த நாளே ட்ரம்பின் இந்த கருத்து வெளியாகியுள்ளது.
இதற்கு முன்னர் கடந்த திங்கட்கிழமை ஊடகமொன்றுக்கு கருத்து வெளியிட்டிருந்த ட்ரம்ப், எண்ணெய் வளம் மிக்க வெனிசுலாவை அமெரிக்காவின் புதிய மாநிலமாக மாற்றுவது தொடர்பில் பரிசீலித்து வருவதாக கூறியிருந்தார்.
எனினும், அந்த யோசனையை முற்றாக நிராகரித்த டெல்சி ரோட்ரிக்ஸ், வெனிசுலா மக்களின் சுதந்திரத்தையும் நாட்டின் இறையாண்மையையும் எந்த நிலையிலும் விட்டுக்கொடுக்கப் போவதில்லை என உறுதியாக தெரிவித்துள்ளார்.
