உலகில் குறைந்தபட்ச சம்பளம் பெறும் நாடுகளின் தரவரிசையில் இலங்கை 120ஆவது இடத்தில் உள்ளதாக ‘விசுவல் கேப்பிட்டலிஸ்ட்’ (Visual Capitalist) இணையத்தளம் தெரிவித்துள்ளது.
சர்வதேச தொழிலாளர் அமைப்பின் தரவுகளை அடிப்படையாகக் கொண்டு, ஒவ்வொரு நாட்டிலும் வழங்கப்படும் மாதாந்த குறைந்தபட்ச சம்பளம் மற்றும் அந்தத் தொகையின் வாங்கும் திறன் ஆகியவற்றை ஒப்பிட்டு இந்த தரவரிசை தயாரிக்கப்பட்டுள்ளது.
அதன்படி, இலங்கைக்கு பின்னால் நைஜர், பூட்டான், ஹைட்டி, கினி, கானா மற்றும் காம்பியா ஆகிய நாடுகள் இடம்பெற்றுள்ளன.
இலங்கையின் குறைந்தபட்ச மாதச் சம்பளத்தின் வாங்கும் திறன் அடிப்படையில் அதன் மதிப்பு 200 அமெரிக்க டொலர்களாகக் கணக்கிடப்பட்டுள்ளது. இது இலங்கை நாணயத்தில் சுமார் 66,000 ரூபாவுக்கு சமமானதாகும் என அந்த அறிக்கையில் குறிப்பிடப்பட்டுள்ளது.
ஆசிய நாடுகளில் அதிகளவான குறைந்தபட்ச சம்பளத்தை வழங்கும் நாடுகளில் தென் கொரியா முன்னிலையில் உள்ளது. அந்நாட்டின் குறைந்தபட்ச சம்பளத்தின் மதிப்பு 2,366 அமெரிக்க டொலர்களாகக் குறிப்பிடப்பட்டுள்ளது.
இதேவேளை, உலகளாவிய தரவரிசையில் சுவிட்சர்லாந்து முதலிடத்தைப் பிடித்துள்ளது. அந்நாட்டின் குறைந்தபட்ச சம்பளம் 3,804 அமெரிக்க டொலர்களாக மதிப்பிடப்பட்டுள்ளது.
