இலங்கையின் ஏற்றுமதித் துறையில் தொடரும் வளர்ச்சி!

இலங்கையின் ஏற்றுமதித்துறை 2026ஆம் ஆண்டிலும் தொடர்ந்து வலுவான வளர்ச்சியைப் பதிவு செய்துள்ளது.

அதன்படி, 2026ஆம் ஆண்டு ஜனவரி முதல் ஜூலை வரையான முதல் ஏழு மாதங்களில் பொருட்கள் மற்றும் சேவைகள் மூலம் இலங்கை பெற்றுக்கொண்ட மொத்த ஏற்றுமதி வருவாய் 10.49 பில்லியன் அமெரிக்க டொலர்களாக அதிகரித்துள்ளது.

இது 2025ஆம் ஆண்டின் இதே காலப்பகுதியுடன் ஒப்பிடுகையில் 5.5 சதவீத வளர்ச்சியாகும்.

மொத்த ஏற்றுமதி வருவாயில் சரக்கு ஏற்றுமதிகள் தொடர்ந்து முக்கிய பங்களிப்பை வழங்கி வருகின்றன. 2026ஆம் ஆண்டின் முதல் ஏழு மாதங்களில் சரக்கு ஏற்றுமதி மூலம் 8.19 பில்லியன் அமெரிக்க டொலர் வருவாய் ஈட்டப்பட்டுள்ளது.

இந்தத் தொகை கடந்த ஆண்டின் இதே காலப்பகுதியுடன் ஒப்பிடுகையில் 5.05 சதவீத வளர்ச்சியைப் பதிவு செய்துள்ளது.

இதனிடையே, சேவை ஏற்றுமதித்துறையும் தொடர்ச்சியான வளர்ச்சியைப் பதிவு செய்துள்ளது. 2026 ஜனவரி முதல் ஜூலை வரையான காலப்பகுதியில் சேவை ஏற்றுமதி மூலம் சுமார் 2.3 பில்லியன் அமெரிக்க டொலர் வருவாய் கிடைத்துள்ளது. இது கடந்த ஆண்டின் இதே காலப்பகுதியுடன் ஒப்பிடுகையில் 7.02 சதவீத அதிகரிப்பாகும்.

இலங்கை சுங்கத் திணைக்களத்தின் தற்காலிகத் தரவுகள் மற்றும் இரத்தினக்கல், ஆபரணங்கள் மற்றும் பெட்ரோலியப் பொருட்களின் மதிப்பிடப்பட்ட ஏற்றுமதி பெறுமதிகளை அடிப்படையாகக் கொண்ட கணக்கீட்டின்படி, 2026 ஜூலை மாதத்தில் சரக்கு ஏற்றுமதி வருவாய் 1.29 பில்லியன் அமெரிக்க டொலர்களாக பதிவாகியுள்ளது.

எனினும், இது 2025 ஜூலை மாதத்துடன் ஒப்பிடுகையில் 1.3 சதவீத சரிவாகும்.

அதேவேளை, சேவை ஏற்றுமதி 2026 ஜூலை மாதத்தில் சுமார் 351.92 மில்லியன் அமெரிக்க டொலர் வருவாயை ஈட்டியுள்ளது. இது கடந்த ஆண்டின் இதே மாதத்துடன் ஒப்பிடுகையில் 3.75 சதவீத வளர்ச்சியாகும்.

இதன் அடிப்படையில், 2026 ஜூலை மாதத்தில் பொருட்கள் மற்றும் சேவைகள் மூலம் இலங்கையின் மொத்த ஏற்றுமதி வருவாய் சுமார் 1.64 பில்லியன் அமெரிக்க டொலர்களாக பதிவாகியுள்ளது.

இது 2025 ஜூலை மாதத்துடன் ஒப்பிடுகையில் 2.63 சதவீத வளர்ச்சியைப் பிரதிபலிக்கிறது.