இந்து மக்களின் முக்கியமான பண்டிகைகளில் ஒன்றான நவராத்திரி விரதம் இன்று (11) ஆரம்பமாகின்றது.
ஒன்பது நாட்கள் அம்பிகையின் பல்வேறு வடிவங்களை வழிபடும் நவராத்திரி விழா, இம்முறை எதிர்வரும் ஒக்டோபர் 20ஆம் திகதி விஜயதசமியுடன் நிறைவடைகின்றது.
நவராத்திரியின் முதல் மூன்று நாட்களும் துர்க்கை அம்மனையும், அடுத்த மூன்று நாட்களும் மகாலட்சுமியையும், இறுதி மூன்று நாட்களும் சரஸ்வதி தேவியையும் வழிபடுவது இந்து மரபாகும்.
நவராத்திரியின் முதல் நாளான இன்று, பக்தர்கள் பழங்கள், கற்கண்டு மற்றும் மலர்களைப் படைத்து அம்பிகையை வழிபடலாம். மாலையில் வெண்பொங்கல், சர்க்கரைப் பொங்கல் அல்லது சுண்டல் போன்ற நைவேத்தியங்களைப் படைத்து வழிபடுவதும் வழக்கமாகும்.
மேலும், குங்குமம் மற்றும் மலர்களால் அர்ச்சனை செய்து, அபிராமி அந்தாதி, லலிதா சகஸ்ரநாமம், துர்காஷ்டகம் உள்ளிட்ட அம்பிகைக்குரிய ஸ்தோத்திரங்களைப் பாடி பக்தர்கள் வழிபாடுகளில் ஈடுபடலாம்.
முதல் மூன்று நாட்களும் வீரியம், தைரியம் மற்றும் தீமைகளை அழிக்கும் சக்தியின் அடையாளமாக துர்க்கை அம்மன் வழிபடப்படுகின்றார். அடுத்த மூன்று நாட்களும் செல்வம் மற்றும் செழிப்பை அருளும் மகாலட்சுமிக்கும், இறுதி மூன்று நாட்களும் கல்வி, ஞானம் மற்றும் கலைகளை அருளும் சரஸ்வதி தேவிக்கும் சிறப்பு வழிபாடுகள் இடம்பெறுகின்றன.
நவராத்திரியின் இறுதி நாளான விஜயதசமி, கல்வி, கலை மற்றும் புதிய முயற்சிகளை ஆரம்பிப்பதற்கான சிறப்பான நாளாகக் கருதப்படுகின்றது.
நவராத்திரி காலத்தில் அம்பிகையைப் பக்தியுடன் வழிபடுவதன் மூலம் வாழ்வில் நன்மைகளும் செழிப்பும் பெருகும் என்பது இந்து மக்களின் நம்பிக்கையாகும்.
