சவுதி அரேபியாவின் தலைநகர் ரியாத்திலுள்ள விமான நிலையத்தைப் பாதித்த பாதுகாப்புச் சம்பவத்தைத் தொடர்ந்து, ரியாத்துக்கான அனைத்து விமான சேவைகளையும் எதிர்வரும் ஒக்டோபர் 18ஆம் திகதி வரை தற்காலிகமாக இடைநிறுத்துவதற்கு ஸ்ரீலங்கன் எயார்லைன்ஸ் நடவடிக்கை எடுத்துள்ளது.
இது தொடர்பில் ஒக்டோபர் 10ஆம் திகதி வெளியிட்ட அறிவிப்பில், பயணிகள் மற்றும் விமானப் பணியாளர்களின் பாதுகாப்பை உறுதிப்படுத்துவதற்காகவும், தற்போதைய பாதுகாப்பு நிலைமை மற்றும் விமானச் செயற்பாடுகளை மதிப்பீடு செய்வதற்காகவும் இந்தத் தீர்மானம் எடுக்கப்பட்டுள்ளதாக நிறுவனம் தெரிவித்துள்ளது.
தற்போதைய நிலைமை வணிக ரீதியான விமானச் சேவைகளை முன்னெடுப்பதற்குப் பாதுகாப்பானது என மதிப்பிடப்பட்ட பின்னரே சேவைகள் மீண்டும் ஆரம்பிக்கப்படும் என்றும் நிறுவனம் குறிப்பிட்டுள்ளது.
இதற்கிடையில், ரியாத்திலுள்ள கிங் காலித் சர்வதேச விமான நிலையம் மீது ஒக்டோபர் 10ஆம் திகதி நடத்தப்பட்ட ஏவுகணைத் தாக்குதலில் 12 பேர் உயிரிழந்ததுடன், 300க்கும் மேற்பட்டோர் காயமடைந்ததாக சர்வதேச ஊடகங்கள் செய்தி வெளியிட்டுள்ளன. இந்தச் சம்பவத்தைத் தொடர்ந்து விமான நிலையச் செயற்பாடுகளும் பாதிக்கப்பட்டுள்ளன.
இதனால் இலங்கைக்கும் ரியாத்துக்கும் இடையில் பயணிக்கத் திட்டமிட்டுள்ள பயணிகள் தமது விமானப் பயணங்களின் தற்போதைய நிலைவரத்தை உறுதிப்படுத்திக்கொள்ளுமாறு அறிவுறுத்தப்பட்டுள்ளனர்.
பாதிக்கப்பட்ட பயணிகள் இலங்கைக்குள் 1979 என்ற தொலைபேசி இலக்கத்துடனும், வெளிநாடுகளிலிருந்து +94 11 777 1979 என்ற இலக்கத்துடனும் தொடர்புகொள்ளலாம். அத்துடன், +94 74 444 1979 என்ற வாட்ஸ்அப் இலக்கம், தமது பயண முகவர்கள் அல்லது ஸ்ரீலங்கன் எயார்லைன்ஸின் உத்தியோகபூர்வ இணையத்தளம் ஊடாகவும் மேலதிக தகவல்களைப் பெற்றுக்கொள்ள முடியும்.
மத்திய கிழக்கில் நிலவும் பாதுகாப்பு நிலைமைகளுக்கு மத்தியில், பயணிகள் தமது பயணத் திட்டங்களை உறுதிப்படுத்திக்கொண்டு விமான நிலையங்களுக்குச் செல்லுமாறு அறிவுறுத்தப்படுகின்றனர்.
