திருகோணமலையிலிருந்து சுற்றுலாப் பயணிகளை ஏற்றிவருவதற்காகக் கொழும்பு நோக்கிப் பயணித்த தனியார் சொகுசு பேருந்து ஒன்று, ஏ6 பிரதான வீதியில் வைத்து இன்று (11) அதிகாலை முழுமையாகத் தீக்கிரையாகியுள்ளது.
ஹபரண பொலிஸ் பிரிவுக்குட்பட்ட ஜக்கா பங்குவ பகுதியை அண்மித்த 144ஆம் கட்டைப் பகுதியில் அதிகாலை சுமார் 3 மணியளவில் இந்தச் சம்பவம் இடம்பெற்றுள்ளது.
குறித்த பேருந்தில் சாரதியும் உதவியாளரும் மாத்திரமே பயணித்த நிலையில், இருவரும் எவ்வித காயங்களுமின்றி உயிர் தப்பியுள்ளதாகத் தெரிவிக்கப்படுகிறது.
திருகோணமலைக்கு வருகைதரவிருந்த வெளிநாட்டு சுற்றுலாப் பயணிகளை ஏற்றிச் செல்வதற்காகக் குறித்த பேருந்து பயணித்துக்கொண்டிருந்தபோதே இந்தத் தீ விபத்து ஏற்பட்டுள்ளது.
தீ விபத்துக்கான காரணம் இதுவரை கண்டறியப்படாத நிலையில், சம்பவம் தொடர்பில் ஹபரண பொலிஸார் மேலதிக விசாரணைகளை முன்னெடுத்து வருகின்றனர்.
