மட்டக்களப்பு, ஏறாவூர் பொலிஸ் பிரிவில் 11 வயது சிறுமியைக் கடத்திச் சென்று பாலியல் துஷ்பிரயோகத்துக்கு உட்படுத்திய 37 வயதுடைய நபருக்கு 25 ஆண்டுகள் சாதாரண சிறைத்தண்டனை விதித்து மட்டக்களப்பு மேல் நீதிமன்றம் தீர்ப்பளித்துள்ளது.
குறித்த சம்பவம் 2020ஆம் ஆண்டு இடம்பெற்றுள்ளதுடன், இது தொடர்பில் சட்டமா அதிபரால் மட்டக்களப்பு மேல் நீதிமன்றத்தில் வழக்குத் தொடரப்பட்டிருந்தது.
சிறுமியைக் கடத்திச் சென்றமை மற்றும் பாலியல் துஷ்பிரயோகத்துக்கு உட்படுத்தியமை ஆகிய இரண்டு குற்றச்சாட்டுகளின் கீழ் குற்றப்பத்திரிகை தாக்கல் செய்யப்பட்டு வழக்கு விசாரணை முன்னெடுக்கப்பட்டது.
இந்நிலையில், குறித்த நபர் கடந்த செப்டெம்பர் 25ஆம் திகதி குற்றவாளியாகக் காணப்பட்டார். இதையடுத்து, மட்டக்களப்பு மேல் நீதிமன்ற நீதிபதி ரி.ஜே. பிரபாகரன், வெள்ளிக்கிழமை (09.10.2026) தண்டனைத் தீர்ப்பை அறிவித்தார்.
இதன்படி, சிறுமியைக் கடத்திச் சென்ற குற்றத்துக்கு 10 ஆண்டுகளும், பாலியல் துஷ்பிரயோகக் குற்றத்துக்கு 15 ஆண்டுகளுமாக மொத்தம் 25 ஆண்டுகள் சாதாரண சிறைத்தண்டனை விதிக்கப்பட்டது.
மேலும், பாதிக்கப்பட்ட சிறுமிக்கு ஒரு இலட்சம் ரூபாய் நஷ்டஈடு வழங்குமாறும், அதனைச் செலுத்தத் தவறினால் மேலதிகமாக இரண்டு ஆண்டுகள் சிறைத்தண்டனை அனுபவிக்க வேண்டும் என்றும் நீதிபதி உத்தரவிட்டார்.
அத்துடன், 20 ஆயிரம் ரூபாய் தண்டப்பணமும் விதிக்கப்பட்டுள்ளது.
