ரஷ்யா மற்றும் உக்ரேன் இடையே எரிசக்தி நிலையங்களை இலக்காகக் கொண்ட தாக்குதல்களை நிறுத்துவதற்கான போர்நிறுத்த ஒப்பந்தம் எட்டப்பட்டுள்ளதாக அமெரிக்க ஜனாதிபதி டொனால்ட் ட்ரம்ப் ஞாயிற்றுக்கிழமை திடீரென அறிவித்துள்ளார்.
இந்தப் போர்நிறுத்தம் உடனடியாக அமுலுக்கு வருவதாக ட்ரம்ப் தெரிவித்துள்ள போதிலும், ஒப்பந்தத்தின் முழுமையான விபரங்கள் இன்னும் கிடைக்கவில்லை என உக்ரேன் ஜனாதிபதி வோலோடிமிர் ஜெலென்ஸ்கி தெரிவித்துள்ளார். அதேவேளை, இந்த அறிவிப்பு தொடர்பில் ரஷ்ய தரப்பிலிருந்து உத்தியோகபூர்வ உறுதிப்படுத்தல் எதுவும் வெளியாகவில்லை.
உக்ரேன் தனது தாக்குதல்களை நிறுத்த வேண்டும் என ட்ரம்ப் தொடர்ந்து அழுத்தம் கொடுத்து வந்த நிலையில், இந்த அறிவிப்பு வெளியாகியுள்ளது. குறிப்பாக, ரஷ்யாவின் எண்ணெய் சுத்திகரிப்பு நிலையங்கள் மீதான உக்ரேனியத் தாக்குதல்களை உடனடியாக நிறுத்துமாறு ஜெலென்ஸ்கியிடம் ட்ரம்ப் சனிக்கிழமை வலியுறுத்தியிருந்தார்.
மேலும், உக்ரேனில் புதிய தேர்தல்களை நடத்தி தலைமையை மாற்றுவது குறித்தும் அவர் கருத்துத் தெரிவித்திருந்தார். ரஷ்யாவுடன் உடன்பாட்டை எட்டுவதற்கான பல வாய்ப்புகளை ஜெலென்ஸ்கி தவறவிட்டுள்ளதாகவும் ட்ரம்ப் குற்றஞ்சாட்டியிருந்தார்.
இந்நிலையில், தனது ‘ட்ரூத் சோஷியல்’ சமூக வலைத்தளத்தில் வெளியிட்ட பதிவில், ரஷ்யாவும் உக்ரேனும் எரிசக்தி தொடர்பான போர்நிறுத்தத்திற்கு இணங்கியுள்ளதாக ட்ரம்ப் அறிவித்தார். எனினும், இந்த ஒப்பந்தத்தின் காலப்பகுதி, நிபந்தனைகள் மற்றும் நடைமுறைப்படுத்தப்படும் விதம் குறித்து அவர் மேலதிக விளக்கங்களை வழங்கவில்லை.
உலகளாவிய எரிபொருள் விலை உயர்வு தொடர்பான கவலைகள் அதிகரித்துள்ள சூழலில் இந்த அறிவிப்பு வெளியாகியுள்ளது. எரிசக்தி நிலையங்கள் மீதான தாக்குதல்கள் மற்றும் சர்வதேச மோதல்கள் காரணமாக எரிபொருள் விநியோகத்தில் ஏற்படக்கூடிய பாதிப்புகள் குறித்தும் கவனம் செலுத்தப்பட்டு வருகிறது.
இதற்கிடையில், ரஷ்ய எரிசக்தி உட்கட்டமைப்புகள் மீதான தாக்குதல்களை நிறுத்துமாறு உக்ரேனுக்கு அமெரிக்கா அழுத்தம் கொடுத்துள்ளதாகத் தகவல்கள் வெளியாகியுள்ளன. இதற்காக, உக்ரேனுடன் பகிரப்படும் உளவுத் தகவல்களை நிறுத்துவதுடன், முன்னுரிமை அடிப்படையில் ஆயுதங்களைக் கொள்வனவு செய்வதற்கான திட்டத்தையும் இடைநிறுத்துவதாக அமெரிக்கா எச்சரித்ததாக இந்த விவகாரம் தொடர்பில் அறிந்த ஒருவர் தெரிவித்துள்ளார். இந்தத் தகவலை ‘பைனான்சியல் டைம்ஸ்’ முன்னதாக வெளியிட்டிருந்தது.
அதேவேளை, அமெரிக்காவுடனான உறவில் ஏற்பட்டுள்ள பதற்றத்தைத் தணிப்பதற்காக ஜெலென்ஸ்கி ஐரோப்பியத் தலைவர்களுடன் கலந்துரையாடி வருவதாகவும் தெரிவிக்கப்பட்டுள்ளது.
ட்ரம்ப்பின் போர்நிறுத்த அறிவிப்பு தொடர்பில் நேட்டோ பொதுச் செயலாளர் மார்க் ரூட்டே, கனடா பிரதமர் மார்க் கார்னி மற்றும் பின்லாந்து ஜனாதிபதி அலெக்சாண்டர் ஸ்டப் ஆகியோருடன் கலந்துரையாடியுள்ளதாகவும் ஜெலென்ஸ்கி குறிப்பிட்டுள்ளார்.
எனினும், இந்தப் போர்நிறுத்த அறிவிப்பு நடைமுறையில் எவ்வாறு அமுல்படுத்தப்படும் என்பதும், இரு தரப்பினரும் அதனை உத்தியோகபூர்வமாக உறுதிப்படுத்துவார்களா என்பதும் இன்னும் தெளிவாகவில்லை.
