நாடளாவிய ரீதியில் முன்னெடுக்கப்பட்ட விசேட சுற்றிவளைப்பு நடவடிக்கைகளின்போது, கட்டாய SLS தரச்சான்றிதழ் இன்றி விற்பனை செய்யப்பட்ட சுமார் 327 தலைக்கவசங்கள் பறிமுதல் செய்யப்பட்டுள்ளதாக நுகர்வோர் விவகார அதிகாரசபை தெரிவித்துள்ளது.
21 மாவட்டங்களை உள்ளடக்கிய வகையில் கடந்த ஒக்டோபர் 6ஆம் திகதி முதல் முன்னெடுக்கப்பட்ட 84 சுற்றிவளைப்புகளின்போதே இவை கைப்பற்றப்பட்டுள்ளன.
SLS 517 தரநியமங்களுக்கு அமைவாக, தலைக்கவசங்களில் SLS சான்றிதழ் முத்திரை கட்டாயமாக்கப்பட்டுள்ளது. இந்நிலையில், கம்பஹா, முல்லைத்தீவு மற்றும் மன்னார் மாவட்டங்களில் போலியான SLS ஸ்டிக்கர்கள் பயன்படுத்தப்பட்டமை தொடர்பிலும் விசாரணைகள் முன்னெடுக்கப்பட்டுள்ளன.
மேலும், தரமற்ற தலைக்கவசங்களை சந்தைக்கு விநியோகித்த இறக்குமதியாளர்கள், உற்பத்தியாளர்கள் மற்றும் மொத்த விநியோகஸ்தர்களைக் கண்டறியும் நடவடிக்கைகள் ஆரம்பிக்கப்பட்டுள்ளன. சிறுவர்களுக்கான தலைக்கவசங்களும் தரச்சான்றிதழ் இன்றி விற்பனை செய்யப்பட்டமை கண்டறியப்பட்டுள்ளது.
