இலங்கை பெற்றோலியக் கூட்டுத்தாபனத்தின் ஊடாக நாடளாவிய ரீதியில் புதிதாக 75 எரிபொருள் நிரப்பு நிலையங்களை அமைக்கத் திட்டமிட்டுள்ளதாக ஜனாதிபதி அநுரகுமார திசாநாயக்க தெரிவித்துள்ளார்.
இலங்கை பொருளாதார மற்றும் முதலீட்டு மாநாட்டில் உரையாற்றியபோதே அவர் இதனைத் தெரிவித்துள்ளார்.
இலங்கை பெற்றோலியக் கூட்டுத்தாபனம் இந்த ஆண்டின் இதுவரையான காலப்பகுதியில் 28 பில்லியன் ரூபாய் வருமானத்தை ஈட்டியுள்ளதாகவும், அதன் வருமான இலக்கு 30 பில்லியன் ரூபாயாக நிர்ணயிக்கப்பட்டிருந்ததாகவும் ஜனாதிபதி குறிப்பிட்டுள்ளார்.
நெருக்கடியான சூழ்நிலைகளில் நிறுவனங்கள் தமது இலாபத்தின் ஒரு பகுதியை மக்களுக்கு நன்மையளிக்கும் வகையில் பயன்படுத்த வேண்டும் எனத் தெரிவித்த அவர், சில தனியார் நிறுவனங்கள் வருமானத்தை மட்டுமே கருத்திற்கொண்டு எரிபொருள் விநியோகத்தைக் கட்டுப்படுத்துவதாகவும் குற்றஞ்சாட்டியுள்ளார்.
தனியார் களஞ்சியசாலைகளில் எரிபொருள் இருப்பினும், அவை உரிய முறையில் விநியோகிக்கப்படாமை தவறான செயற்பாடு எனக் குறிப்பிட்ட ஜனாதிபதி, அரச நிறுவனங்களால் குறிப்பிட்ட விலையில் எரிபொருளை வழங்க முடியும் என்றால், தனியார் நிறுவனங்களால் ஏன் அதே விலையில் வழங்க முடியாது என்றும் கேள்வி எழுப்பியுள்ளார்.
போட்டித்தன்மையை அதிகரித்து எரிபொருள் விநியோகத்தை மேம்படுத்தும் நோக்கிலேயே தனியார் துறையினருக்கு வாய்ப்பளிக்கப்பட்டதாகவும், ஆனால் தற்போதைய நிலைமை அந்த வாய்ப்பின் பயன் குறித்து கேள்விகளை எழுப்பியுள்ளதாகவும் அவர் தெரிவித்துள்ளார்.
மேலும், சில நகரங்களில் தனியார் நிறுவனங்களின் எரிபொருள் நிரப்பு நிலையங்கள் மட்டுமே காணப்படுவதாகச் சுட்டிக்காட்டிய ஜனாதிபதி, அந்நிறுவனங்கள் எரிபொருள் விநியோகத்தை நிறுத்தினால் அப்பகுதி மக்களுக்கு ஏற்படக்கூடிய பாதிப்புகள் குறித்தும் கவலை வெளியிட்டுள்ளார்.
இத்தகைய சவால்களைக் கருத்திற்கொண்டே, எரிபொருள் விநியோகத்தை உறுதிப்படுத்தும் நோக்கில் இலங்கை பெற்றோலியக் கூட்டுத்தாபனத்தின் ஊடாக 75 புதிய எரிபொருள் நிரப்பு நிலையங்களை அமைக்கத் தீர்மானித்துள்ளதாக ஜனாதிபதி மேலும் தெரிவித்துள்ளார்.
