இணையம் மற்றும் சமூக ஊடகங்கள் ஊடாக சிறுவர்கள் குற்றவாளிகளால் இலக்கு வைக்கப்படுவது அதிகரித்து வருவதாகவும், போதைப்பொருள் தொடர்பான நடவடிக்கைகளிலும் அவர்கள் ஈடுபடுத்தப்படும் அபாயம் காணப்படுவதாகவும் பொதுப் பாதுகாப்பு பிரதி அமைச்சர் சுனில் வட்டகல எச்சரித்துள்ளார்.
கொழும்பில் நடைபெற்ற நிகழ்வொன்றில் உரையாற்றிய அவர், பல பாடசாலை மாணவர்கள் இணையப் பாதுகாப்பு தொடர்பான போதிய விழிப்புணர்வின்றி சமூக ஊடகங்களைப் பயன்படுத்தி வருவதாகக் குறிப்பிட்டார்.
அத்துடன், பாடசாலைக்குச் செல்லாத சிறுவர்கள் குற்றக் குழுக்களால் ஆட்சேர்ப்பு செய்யப்படும் அபாயம் அதிகமாகக் காணப்படுவதாகவும் அவர் சுட்டிக்காட்டினார்.
சிறுவர்கள் குற்றச் செயல்களுக்காகப் பயன்படுத்தப்படுவதைத் தடுப்பதற்கான நடவடிக்கைகளுக்கு இலங்கைப் பொலிஸார் முன்னுரிமை வழங்கி வருவதாகவும், இது தொடர்பில் பொலிஸ் சிறுவர் மற்றும் மகளிர் பணியகத்திற்குப் பல முறைப்பாடுகளும் தகவல்களும் கிடைத்துள்ளதாகவும் பிரதி அமைச்சர் மேலும் தெரிவித்தார்.
