இலங்கை இசை படைப்பாளர்கள் மற்றும் இசை வெளியீட்டாளர்கள் சங்கம் (ACPOSL), பாடல்களுக்கான காப்புரிமைக் கட்டணம் மற்றும் உரிமம் வழங்கும் நடைமுறைகளை எதிர்வரும் நவம்பர் மாதம் நடைபெறவுள்ள வருடாந்த பொதுக்கூட்டம் வரை தற்காலிகமாக இடைநிறுத்தத் தீர்மானித்துள்ளது.
பாடல்களின் காப்புரிமை மற்றும் உரிமக் கட்டண முறைமை தொடர்பாக அண்மைக்காலமாகப் பாடகர்கள், இசைப் படைப்பாளர்கள் உள்ளிட்ட கலைத்துறையினரிடையே கருத்து வேறுபாடுகள் எழுந்துள்ளன. இதனைக் கருத்தில் கொண்டு, பல்வேறு தரப்பினரின் கருத்துக்களுக்கு மதிப்பளித்து இந்தத் தீர்மானம் எடுக்கப்பட்டுள்ளதாகச் சங்கம் தெரிவித்துள்ளது.
மேலும், முன்மொழியப்பட்ட உரிமக் கட்டமைப்பு மற்றும் கட்டண முறைகளை மீளாய்வு செய்து, இசைத்துறையின் அனைத்துத் தரப்பினருடனும் பேச்சுவார்த்தைகளை முன்னெடுக்கவுள்ளதாகவும் சங்கம் குறிப்பிட்டுள்ளது.
இந்தத் தற்காலிக இடைநிறுத்தம் சங்கத்தின் சட்டப்பூர்வ நிலையைப் பாதிக்காது எனத் தெரிவித்துள்ள சங்கம், வெளிப்படைத்தன்மையுடன் அனைத்துத் தரப்பினரின் நலன்களையும் பாதுகாக்கும் வகையில் திருத்தப்பட்ட நடைமுறைகளை உருவாக்க நடவடிக்கை எடுக்கவுள்ளதாகவும் தெரிவித்துள்ளது.
