சர்வதேச நாணய நிதியத்தின் (IMF) அண்மைய ‘உலக பொருளாதார தொலைநோக்கு’ (World Economic Outlook) அறிக்கையின்படி, 2027 ஆம் ஆண்டிற்கான இலங்கையின் மொத்த உள்நாட்டு உற்பத்தி வளர்ச்சி 3.7 சதவீதம் வரை மட்டுமே அடையும் என கணிப்பிக்கப்பட்டுள்ளது.
அதேவேளை, நடப்பு ஆண்டிற்கான இலங்கையின் பொருளாதார வளர்ச்சி 4.0 சதவீதமாக இருக்கும் என மதிப்பிடப்பட்டுள்ளது.
மேலும், 2027 ஆம் ஆண்டில் இலங்கையின் பணவீக்க விகிதம் 5.4 சதவீதமாகவும், வேலையின்மை விகிதம் 3.9 சதவீதமாகவும் காணப்படும் என சர்வதேச நாணய நிதியத்தின் இந்த புதிய அறிக்கை சுட்டிக்காட்டியுள்ளது.
அதேநேரம், 2026 ஆம் ஆண்டில் 3.1 சதவீதமாகவும், 2027 ஆம் ஆண்டில் 3.4 சதவீதமாகவும் உலகப் பொருளாதாரம் வளர்ச்சியடையும் என சர்வதேச நாணய நிதியம் கணித்துள்ளது.
அத்துடன், உலகளாவிய முதன்மைப் பணவீக்கம் நடப்பு ஆண்டில் 4.7 சதவீதம் வரை உயர்ந்து, 2027 ஆம் ஆண்டளவில் 4.1 சதவீதம் வரை குறையும் என்றும் எதிர்பார்க்கப்படுகிறது.
யுக்ரைன் மற்றும் மேற்கு ஆசிய பிராந்தியங்களில் நிலவும் போர்ச் சூழல், இதன் காரணமாக எரிபொருள் மற்றும் ஏனைய பொருட்களின் விலைகள் அதிவேகமாக உயர்வடைதல் மற்றும் வர்த்தக தடைகளில் ஏற்பட்டுள்ள குறிப்பிடத்தக்க மாற்றங்கள் ஆகியவை உலகளாவிய பணவீக்க அதிகரிப்பிற்கு முக்கிய காரணங்களாக அமைந்துள்ளதாக சர்வதேச நாணய நிதியம் மேலும் குறிப்பிட்டுள்ளது.
