பௌத்த தேரர்கள் மீது நடவடிக்கைகளை முன்னெடுத்து வரும் அரசாங்கம், அடுத்தகட்டமாக இந்துக் கோவில்களில் பணியாற்றும் குருக்கள் மற்றும் பள்ளிவாசல்களில் உள்ள மௌலவிமார்கள் மீதும் நடவடிக்கை எடுக்க முற்படலாம் என ஐக்கிய குடியரசு முன்னணியின் தலைவர் பாட்டலி சம்பிக்க ரணவக்க குற்றஞ்சாட்டியுள்ளார்.
அரசாங்கம் முதற்கட்டமாக பௌத்த தேரர்களின் காவி உடையை அகற்றி, அவர்களை அடிபணிய வைக்கத் திட்டமிட்டு வருவதாகவும், இதற்கு நாட்டின் தேரர்கள் ஒருபோதும் இடமளிக்க மாட்டார்கள் என்றும் அவர் தெரிவித்துள்ளார்.
பௌத்த மதகுருமார்களுக்கு எதிராக முன்னெடுக்கப்படும் நடவடிக்கைகள் தொடர்பில் கருத்துத் தெரிவித்த அவர், மதத் தலைவர்களின் உரிமைகள் மற்றும் மத நிறுவனங்களின் சுதந்திரம் தொடர்பான விடயங்களில் அரசாங்கத்தின் அணுகுமுறை குறித்து கேள்வி எழுப்பியுள்ளார்.
அதேவேளை, பிக்குகள் பின்பற்ற வேண்டிய அடிப்படை ஒழுக்க நெறிகளை மீறிச் செயற்படும் சில தேரர்களுக்கு எதிராக சட்ட நடவடிக்கைகள் எடுப்பதில் தமக்கு எந்தவித எதிர்ப்பும் இல்லை எனவும் சம்பிக்க ரணவக்க குறிப்பிட்டுள்ளார்.
பிக்குகளுக்கான ஒழுக்க விதிமுறைகள் மற்றும் நாட்டின் பொதுச் சட்டங்கள் மீறப்படும் சந்தர்ப்பங்களில், சம்பந்தப்பட்ட சட்டங்களை நடைமுறைப்படுத்துவதில் தவறில்லை எனவும் அவர் சுட்டிக்காட்டியுள்ளார்.
மேலும், இலங்கையில் ‘பாதாள பிக்குகள்’ அமைப்பை உருவாக்கிய முதலாவது அரசியல் கட்சி மக்கள் விடுதலை முன்னணி (JVP) எனவும் சம்பிக்க ரணவக்க குற்றஞ்சாட்டியுள்ளார்.
அரசாங்கத்தின் நடவடிக்கைகள் மதத் தலைவர்களை இலக்குவைப்பதாக மாறக்கூடும் என்ற தனது அச்சத்தை வெளிப்படுத்தியுள்ள அவர், பௌத்த தேரர்களுக்கு எதிரான நடவடிக்கைகள் எதிர்காலத்தில் ஏனைய மதங்களின் மதகுருமார்களையும் பாதிக்கக்கூடும் எனத் தெரிவித்துள்ளார்.
