சமூக ஊடகங்கள் ஊடாகப் பொய்யான மற்றும் உறுதிப்படுத்தப்படாத தகவல்களைப் பரப்பி, பொதுமக்களைக் குழப்பி சமூக அமைதிக்குக் குந்தகம் விளைவிப்பவர்களுக்கு எதிராகக் கடுமையான சட்ட நடவடிக்கை எடுக்கப்படும் என இலங்கை பொலிஸார் எச்சரித்துள்ளனர்.
ஃபேஸ்புக் உள்ளிட்ட சமூக ஊடகங்களில் தவறான தகவல்களைப் பரப்பி பொதுமக்களிடையே அச்சத்தையும் குழப்பத்தையும் ஏற்படுத்துவோர் கண்காணிக்கப்படுவதாகப் பொலிஸ் ஊடகப் பேச்சாளரும் உதவிப் பொலிஸ் அத்தியட்சகருமான எஃப். யூ. வுட்லர் தெரிவித்துள்ளார்.
இவ்வாறு பொய்யான தகவல்களைப் பதிவிட்டு பொதுமக்களைத் தவறாக வழிநடத்தியதாகச் சந்தேகிக்கப்படும் ஒருவர் நிகவெரட்டிய பொலிஸ் பிரிவில் அண்மையில் கைது செய்யப்பட்டுள்ளார். அவர் நீதிமன்றத்தில் ஆஜர்படுத்தப்பட்டதுடன், மேலதிக சட்ட நடவடிக்கைகளும் முன்னெடுக்கப்பட்டுள்ளன.
எனவே, உறுதிப்படுத்தப்படாத தகவல்களைப் பகிர்வதைத் தவிர்க்குமாறும், கணினிக் குற்றங்கள் தொடர்பான சட்டம் மற்றும் தண்டனைச் சட்டக்கோவையின் கீழ் குற்றவாளிகளுக்கு எதிராக நடவடிக்கை எடுக்கப்படும் என்றும் பொலிஸார் எச்சரித்துள்ளனர்.
