யாழ்ப்பாண மாவட்டத்திலுள்ள 32 பிரதேச வைத்தியசாலைகளில் நிலவும் தாதியர் பற்றாக்குறையால், சுகாதார சேவைகளை வழங்குவதில் பாதிப்பு ஏற்பட்டுள்ளதாகத் தெரிவிக்கப்பட்டுள்ளது.
விபத்துகள் மற்றும் பாம்புக்கடி காரணமாக அனுமதிக்கப்படும் நோயாளர்களுக்குச் சில சந்தர்ப்பங்களில் தாதியர்கள் இல்லாத நிலை காணப்படுவதாகவும், இதனால் சிற்றூழியர்கள் மருந்துகளை வழங்குவதாகவும் மாகாண சுகாதார சேவைத் தகவல் வட்டாரமொன்று தெரிவித்துள்ளது.
வடக்கு மாகாண வைத்தியசாலைகளுக்குப் பயிற்சிக்காக நியமிக்கப்படும் தாதியர்கள், பயிற்சி மற்றும் சேவையை நிறைவு செய்த பின்னர் நாட்டின் ஏனைய பகுதிகளுக்கு இடமாற்றம் செய்யப்படுவதால், இப்பற்றாக்குறை தொடர்வதாகவும் சுட்டிக்காட்டப்பட்டுள்ளது.
இதற்குத் தீர்வாக, வடக்கு மாகாணத்தைச் சேர்ந்தவர்களை அதிகளவில் தாதியர் பயிற்சிக்கு இணைத்துக்கொள்ள வேண்டும் எனக் கோரிக்கை விடுக்கப்பட்டுள்ளது. முன்னாள் சுகாதார அமைச்சர் ராஜித சேனாரத்னவின் காலத்தில், பல்வேறு உயர்தரப் பாடப்பிரிவுகளில் கல்வி கற்ற தமிழ் மாணவர்கள் தாதியர் பயிற்சிக்கு இணைத்துக்கொள்ளப்பட்டதைப் போன்ற திட்டங்களை மீண்டும் நடைமுறைப்படுத்தலாம் எனவும் தெரிவிக்கப்பட்டுள்ளது.
இதேவேளை, தாதியர் பயிற்சிக்கான விண்ணப்பதாரர்கள் மாவட்ட ரீதியாக மாறுபடுவதாகத் தெரிவித்த பிரதி சுகாதார அமைச்சர் வைத்தியர் ஹன்சக விஜேமுனி, விண்ணப்பிக்கும் மாணவர்களின் Z-புள்ளிகளின் அடிப்படையிலேயே பயிற்சிக்கான தெரிவுகள் இடம்பெறுவதாகக் குறிப்பிட்டுள்ளார்.
