சிறைத்தண்டனை அனுபவித்து வரும் கலகொட அத்தே ஞானசார தேரருக்கு நிபந்தனையற்ற விடுதலை வழங்கப்படாவிட்டால், புதிய ஜனாதிபதியைத் தேர்ந்தெடுப்பது குறித்து பரிசீலிக்க வேண்டிய நிலை ஏற்படும் என பலாங்கொட கஸ்ஸப்ப தேரர் எச்சரித்துள்ளார்.
கொழும்பு விஹாரமகாதேவி பூங்காவில் ஞானசார தேரரின் விடுதலையை வலியுறுத்தி முன்னெடுக்கப்பட்டு வரும் போராட்டத்தில் மீண்டும் கலந்துகொண்ட அவர், இந்தக் கருத்தைத் தெரிவித்துள்ளார்.
அரசாங்கத்தைக் கவிழ்ப்பது தங்களது நோக்கமல்ல எனக் குறிப்பிட்ட அவர், ஞானசார தேரரை விடுவிக்கும் பொறுப்பு ஜனாதிபதியிடமே உள்ளதாகவும் தெரிவித்துள்ளார்.
ஜனாதிபதி தொடர்ந்து தமது கோரிக்கையை நிராகரித்தால், மாற்று வழிகளைப் பரிசீலிக்க வேண்டியிருக்கும் எனவும், தேவையானால் புதிய ஜனாதிபதியைத் தேர்ந்தெடுக்க வேண்டிய நிலை ஏற்படலாம் எனவும் அவர் எச்சரித்துள்ளார்.
ஏற்கனவே வைத்தியசாலையில் அனுமதிக்கப்பட்டிருந்த நிலையிலும், ஞானசார தேரரின் விடுதலையை வலியுறுத்தும் போராட்டத்திற்கு வலுச்சேர்க்கும் நோக்கில் மீண்டும் போராட்டத்தில் கலந்துகொண்டதாகவும் கஸ்ஸப்ப தேரர் தெரிவித்துள்ளார்.
ஞானசார தேரரின் விடுதலையை வலியுறுத்தி பிக்குகள் மற்றும் ஆதரவாளர்கள் முன்னெடுத்து வரும் போராட்டம் தொடர்ந்து நடைபெற்று வருகின்றது.
