பிரான்ஸில் வார இறுதியில் இடம்பெற்ற வன்முறைப் போராட்டங்களைத் தொடர்ந்து, இராஜினாமா செய்ய முன்வந்த உள்துறை அமைச்சர் லோரான் நுனெஸின் (Laurent Nunez) கோரிக்கையை ஜனாதிபதி இமானுவேல் மக்ரோன் நிராகரித்துள்ளார்.
வாழ்க்கைச் செலவு அதிகரிப்பு, பொதுச் சேவைகளின் வீழ்ச்சி மற்றும் பாடசாலைகளின் நிலைமை தொடர்பான மக்களின் அதிருப்தியே இந்தப் போராட்டங்களுக்குக் காரணமாக அமைந்துள்ளது.
பொலிஸ் மற்றும் பாதுகாப்புப் படைகளின் கட்டளைத் தொடர் பாதிக்கப்படாமல் இருப்பதை உறுதிப்படுத்தும் நோக்கில், அமைச்சர் தொடர்ந்து பதவியில் இருக்க வேண்டும் என மக்ரோன் வலியுறுத்தியுள்ளார். மேலும், கொள்ளைச் சம்பவங்களைக் கட்டுப்படுத்துவதற்கான புதிய நடவடிக்கைகளை விரைவாகத் தயாரிக்குமாறும் அவர் அறிவுறுத்தியுள்ளார்.
சனிக்கிழமை நாடளாவிய ரீதியில் வெடித்த போராட்டங்கள் வன்முறையாக மாறியதுடன், நகர மண்டபம் ஒன்று தீக்கிரையாக்கப்பட்டது. கடைகள் சூறையாடப்பட்டதுடன், கட்டடங்களிலும் சுவர்களிலும் சுவரொட்டிகள் மற்றும் கிராஃபிட்டி வரையப்பட்டன. இதன்போது வன்முறைக் குழுக்களுக்கும் பொலிஸாருக்கும் இடையில் மோதல்கள் இடம்பெற்றன.
ஞாயிற்றுக்கிழமையும் பாரிஸ் மற்றும் மார்செய் நகரங்களில் மோதல்கள் ஏற்பட்டன. வர்த்தக நிலையங்கள் சூறையாடப்படுவதைத் தடுப்பதற்காகக் கலகத் தடுப்புப் பொலிஸார் தலையிட்டனர்.
