இலங்கைப் பாதுகாப்புப் படையினரின் கட்டுப்பாட்டில் இருந்த உயர் பாதுகாப்பு வலயத்திற்குள் படுகொலை செய்யப்பட்டு, 26 ஆண்டுகள் கடந்தும் நீதி கிடைக்காத தமிழ் ஊடகவியலாளர் ஒருவர், அவர் படுகொலை செய்யப்பட்ட வடக்கில் நினைவுகூரப்பட்டுள்ளார்.
அச்சமற்ற, எளிமையான ஊடகவியலாளர் எனப் பெயரெடுத்திருந்த மயில்வாகனம் நிமலராஜன், துப்பாக்கிச் சூட்டின் மூலம் மௌனமாக்கப்பட்டார். அவரை நினைவுகூரும் வகையில், 2026 ஒக்டோபர் 19ஆம் திகதி திங்கட்கிழமை யாழ்ப்பாணம் ஊடக அமையம், யாழ்ப்பாணம் வடமராட்சி ஊடக இல்லம் மற்றும் முல்லைத்தீவு ஊடக அமையம் ஆகியன மலர் தூவி, தீபமேற்றி அஞ்சலி செலுத்தின.
தமது தொழில்துறை சகாவான மயில்வாகனம் நிமலராஜனை நினைவுகூரும் நிகழ்வில், யாழ்ப்பாணம் ஊடக அமையத்தின் ஊடகவியலாளர்களுடன் இலங்கை தெற்காசியப் பெண்கள் ஊடக அமைப்பும் இணைந்துகொண்டதாகப் பிராந்திய ஊடகவியலாளர்கள் தெரிவிக்கின்றனர்.
எனினும், பெரும்பாலும் சிங்கள மொழியில் வடக்கின் செய்திகளைப் பதிவுசெய்த நிமலராஜனை, தெற்கில் எந்தவொரு ஊடக அமைப்பும் நினைவுகூர்ந்ததாகத் தெரியவில்லை.
வடகிழக்கில் அழிவை ஏற்படுத்திய போர் மற்றும் அதனால் பாதிக்கப்பட்ட வடக்குத் தமிழ் மக்களின் நிலைமைகள் குறித்து, போர் பாதித்த பிரதேசத்திலிருந்து உள்நாட்டு மற்றும் வெளிநாட்டு ஊடகங்கள் வாயிலாக உலகின் கவனத்தை ஈர்க்க ஊடகவியலாளர் மயில்வாகனம் நிமலராஜனால் முடிந்தது.
ஹரய, பிபிசி மற்றும் வீரகேசரி உள்ளிட்ட ஊடக நிறுவனங்களுக்கு தமிழ் மற்றும் சிங்களம் ஆகிய இரு மொழிகளிலும் செய்திகளை வழங்கிவந்த நிமலராஜன், 2000 ஒக்டோபர் 19ஆம் திகதி இரவு யாழ்ப்பாணத்தில் உள்ள தனது வீட்டில் வைத்து சுட்டுக்கொல்லப்பட்டார். போரினால் பாதிக்கப்பட்ட மக்கள் குறித்து வீரகேசரி பத்திரிகைக்காகக் கட்டுரை ஒன்றை எழுதிக்கொண்டிருந்தபோதே அவர் படுகொலை செய்யப்பட்டார்.
முன்னாள் ஜனாதிபதி சந்திரிகா பண்டாரநாயக்க குமாரதுங்கவின் ஆட்சிக்காலத்தில் இடம்பெற்ற இந்தப் படுகொலைக்கு இன்றுவரை நீதி கிடைக்கவில்லை.
இலங்கை அரசின் பாதுகாப்புப் படையினரின் கட்டுப்பாட்டில் இருந்த உயர் பாதுகாப்பு வலயத்திற்குள் படுகொலை செய்யப்பட்டு, 25 ஆண்டுகள் கடந்தும் நீதி கிடைக்காத தமிழ் ஊடகவியலாளர் மயில்வாகனம் நிமலராஜனின் படுகொலை தொடர்பான விசாரணைகளில் காணப்பட்ட தோல்விகளை ஆராயும் புதிய அறிக்கை ஒன்று 2025 செப்டெம்பர் மாதம் வடக்கிலும் தெற்கிலும் வெளியிடப்பட்டது.
நிமலராஜனின் படுகொலை தொடர்பான விசாரணைகளில் காணப்பட்ட தோல்விகளை ஆராயும் அந்த அறிக்கையின் தமிழ் மொழிப் பதிப்பு 2025 செப்டெம்பர் 7ஆம் திகதி யாழ்ப்பாணம் ஊடக அமையத்தில் வெளியிடப்பட்டது. காணாமல் ஆக்கப்பட்டவர்களின் குடும்பங்களின் ஒன்றியம் அந்த அறிக்கையை மூன்று மொழிகளிலும் செப்டெம்பர் 8ஆம் திகதி கொழும்பில் வெளியிடுவதற்கு ஏற்பாடு செய்திருந்தது.
தென்னாப்பிரிக்காவைத் தலைமையகமாகக் கொண்ட உண்மை மற்றும் நீதிக்கான சர்வதேசத் திட்டம் (ITJP) மற்றும் REDRESS ஆகிய அமைப்புகளின் கூட்டுத் தயாரிப்பில் வெளியிடப்பட்ட 64 பக்கங்களைக் கொண்ட அந்த அறிக்கை, பிபிசியின் முன்னாள் யாழ்ப்பாணச் செய்தியாளர் மயில்வாகனம் நிமலராஜனின் படுகொலை தொடர்பான இலங்கைப் பொலிஸ் விசாரணைகள் குறித்து தடயவியல் அடிப்படையிலான ஆய்வை முன்வைத்திருந்தது.
இலங்கையில் ஊடகவியலாளர்களைக் கொலை செய்தவர்களை முறையாகப் பாதுகாக்கும் நடவடிக்கைகள் இடம்பெற்றுள்ள நிலையில், 2000 ஒக்டோபரில் பிபிசியின் யாழ்ப்பாணச் செய்தியாளர் மயில்வாகனம் நிமலராஜன் படுகொலை செய்யப்பட்டமை தொடர்பான பொலிஸ் விசாரணைகளின் தோல்விகள் குறித்து இந்த அறிக்கை கவனம் செலுத்துவதாக, அந்த அறிக்கையை வெளியிட்டதன் பின்னர் ITJP மற்றும் REDRESS ஆகிய அமைப்புகள் வெளியிட்ட ஊடக அறிக்கையில் குறிப்பிடப்பட்டிருந்தது.
2000ஆம் ஆண்டுக்கும் 2010ஆம் ஆண்டுக்கும் இடையில், உள்நாட்டுப் போர் தொடர்பான செய்திகளைச் சேகரித்தபோது இலங்கையில் குறைந்தது 44 ஊடகவியலாளர்களும் ஊடகப் பணியாளர்களும் கொல்லப்பட்டுள்ளனர். இன்றுவரை, அந்தக் கொலைகளுக்குப் பொறுப்பான எந்தவொரு குற்றவாளியும் கைது செய்யப்படவில்லை எனவும் அந்த அறிக்கை வலியுறுத்தியுள்ளது.
“இந்த அளவிலான தண்டனையிலிருந்து தப்பிக்கும் நிலை, தமது உயிரைப் பணயம் வைத்து வழக்கமாகச் செய்திகளைச் சேகரிக்கும், சுய தணிக்கையில் ஈடுபடும் அல்லது நாடுகடத்தப்பட்ட நிலையில் பணியாற்றும் நாட்டில் எஞ்சியுள்ள ஊடகவியலாளர்களுக்கு அச்சமூட்டும் செய்தியை அனுப்புகிறது” என தென்னாப்பிரிக்காவைத் தலைமையகமாகக் கொண்ட ITJP அமைப்பின் நிறைவேற்றுப் பணிப்பாளர் யஸ்மின் சூக்கா தெரிவித்திருந்தார்.
மயில்வாகனம் நிமலராஜனை அவரது வீட்டிற்குள் கைக்குண்டு வீசியும் துப்பாக்கியால் சுட்டும் படுகொலை செய்ததாகக் குற்றஞ்சாட்டப்பட்ட, அரசாங்கத்துடன் இணைந்து செயற்பட்ட ஈபிடிபி துணை இராணுவக் குழுவைச் சேர்ந்த உறுப்பினர்கள் 2003ஆம் ஆண்டு வவுனியா நீதிமன்றத்தால் விடுதலை செய்யப்பட்டனர்.
இந்தப் படுகொலையுடன் நேரடியாகச் சந்தேகிக்கப்படும் ஈபிடிபியின் முக்கிய உறுப்பினரான, ‘நெப்போலியன்’ எனப் பிரபலமாக அறியப்படும் செபஸ்தியன் பிள்ளை ரமேஷ், பொலிஸ் விசாரணைக்கு உட்படுத்தப்படாமலேயே நாட்டைவிட்டு வெளியேறி, பிரித்தானியாவில் தஞ்சம் பெற்றுள்ளதாகத் தெரிவிக்கப்பட்டது.
2017ஆம் ஆண்டு ITJP மற்றும் REDRESS ஆகிய அமைப்புகள், போர்க்குற்றங்கள் மற்றும் மனிதகுலத்திற்கு எதிரான குற்றங்களை விசாரிக்கும் லண்டன் பெருநகரப் பொலிஸின் பயங்கரவாத எதிர்ப்புப் பிரிவின் கீழ் இயங்கும் சிறப்புப் பிரிவிடம் தகவல்களைச் சமர்ப்பித்ததைத் தொடர்ந்து, ஐக்கிய இராச்சியத்தில் விசாரணை ஒன்று முன்னெடுக்கப்பட்டது. இந்தச் சமர்ப்பிப்பின் காரணமாக, 2001ஆம் ஆண்டு யாழ்ப்பாணத்தில் நடைபெற்ற அரசியல் பேரணியின்போது இடம்பெற்றதாகக் கூறப்படும் குற்றங்கள் தொடர்பில் 2023ஆம் ஆண்டு மற்றொரு கைது இடம்பெற்றது.
“சம்பந்தப்பட்ட நாடு நடவடிக்கை எடுக்கத் தவறும்போது, கடுமையான மனித உரிமை மீறல்களில் ஈடுபடும் குற்றவாளிகளைப் பொறுப்புக்கூறச் செய்வதில் ஐக்கிய இராச்சியம் போன்ற நாடுகள் எவ்வாறு முக்கிய பங்காற்ற முடியும் என்பதை இந்தச் சம்பவம் எடுத்துக்காட்டுகிறது” என REDRESS அமைப்பின் பணிப்பாளர் ரூபர்ட் ஸ்கில்பெக் கடந்த ஆண்டு தெரிவித்திருந்தார்.
