இறக்காமம் நீதிமன்றப் பிரச்சினை; பாராளுமன்றத்தில் இன்று கேள்வி எழுப்பும் உதுமாலெப்பை எம்.பி

இறக்காமம் பிரதேசத்தின் நீதிமன்ற நடவடிக்கைகளை மீண்டும் அக்கரைப்பற்று நீதிமன்றத்துடன் இணைப்பது அல்லது அப்பிரதேசத்திற்கெனத் தனியான சுற்றுலா நீதிமன்றத்தை அமைப்பது தொடர்பில் ஸ்ரீலங்கா முஸ்லிம் காங்கிரஸின் தேசிய அமைப்பாளரும் திகாமடுல்ல மாவட்ட பாராளுமன்ற உறுப்பினருமான எம்.எஸ். உதுமாலெப்பை இன்று (21) பாராளுமன்றத்தில் கேள்வி எழுப்பவுள்ளார்.

பாராளுமன்ற சபை ஒத்திவைப்பு வேளையின்போது, நீதியமைச்சர் ஹர்ஷண நாணயக்காரவிடம் இது தொடர்பான விளக்கத்தை அவர் கோரவுள்ளார்.

12 கிராம உத்தியோகத்தர் பிரிவுகளையும் சுமார் 18,000 மக்களையும் கொண்ட இறக்காமம் பிரதேசத்தில், 94 சதவீதத்திற்கும் அதிகமானோர் தமிழ் பேசும் மக்களாவர். இந்நிலையில், எவ்வித முன்னறிவித்தலுமின்றி இறக்காமம் நீதிமன்ற நடவடிக்கைகள் சிங்கள மொழி பயன்பாட்டிலுள்ள அம்பாறை நீதிமன்றத்துடன் இணைக்கப்பட்டுள்ளதாகத் தெரிவிக்கப்படுகிறது.

இதனால், தமிழ் பேசும் மக்கள் சிங்கள மொழியில் வழக்குகளைத் தாக்கல் செய்ய வேண்டிய நிலை ஏற்பட்டுள்ளதுடன், வாக்குமூலங்கள் மற்றும் ஏனைய சட்ட ஆவணங்களை மொழிபெயர்ப்பதற்காக மேலதிக பணத்தையும் நேரத்தையும் செலவிட வேண்டியுள்ளதாகச் சுட்டிக்காட்டப்படுகிறது.

இந்தப் பிரச்சினைக்குத் தீர்வாக, இறக்காமம் நீதிமன்ற நடவடிக்கைகளை மீண்டும் அக்கரைப்பற்று நீதிமன்றத்துடன் இணைக்க வேண்டும் அல்லது இறக்காமம் பிரதேசத்திற்கெனத் தனியான சுற்றுலா நீதிமன்றத்தை அமைக்க வேண்டும் என்ற தீர்மானம் அம்பாறை மாவட்ட ஒருங்கிணைப்புக் குழுக் கூட்டத்தில் நிறைவேற்றப்பட்டு, நீதியமைச்சின் செயலாளருக்கும் அனுப்பி வைக்கப்பட்டுள்ளது.

மேலும், கடந்த 2025 ஜூன் 17ஆம் திகதி நடைபெற்ற நீதியமைச்சின் ஆலோசனைக் குழுக் கூட்டத்திலும் இது தொடர்பான முன்மொழிவு சமர்ப்பிக்கப்பட்டுள்ளது. எனினும், ஒரு வருடத்திற்கும் மேலாகியும் இதுவரை உரிய நடவடிக்கைகள் எடுக்கப்படவில்லை எனத் தெரிவிக்கப்படுகிறது.

இதேவேளை, இறக்காமத்தில் சுற்றுலா நீதிமன்றம் இயங்கி வருவதாக நீதிச் சேவைகள் ஆணைக்குழுவின் பிரதிச் செயலாளர் இசுரு தெரிவித்திருந்த போதிலும், அவ்வாறானதொரு நீதிமன்றம் இதுவரை அமைக்கப்படவில்லை என இறக்காமம் பிரதேச செயலாளரும் பிரதேச சபைத் தவிசாளரும் சுட்டிக்காட்டியுள்ளனர்.

இவ்வாறான சூழலில், இறக்காமம் மக்களின் நீதித்துறை சார்ந்த பிரச்சினைக்குத் தீர்வு காணும் நோக்கில், உரிய நடவடிக்கைகளை எடுக்குமாறு வலியுறுத்தி உதுமாலெப்பை எம்.பி. இன்று பாராளுமன்றத்தில் கேள்வி எழுப்பவுள்ளார்.