முல்லைத்தீவில் இடம்பெற்ற மோட்டார் சைக்கிள் விபத்தில் படுகாயமடைந்து மூளைச்சாவடைந்த 53 வயதுடைய தாயின் இரண்டு சிறுநீரகங்களும் தானமாக வழங்கப்பட்டுள்ளன. இதன் மூலம் சிறுநீரக மாற்று அறுவைச் சிகிச்சைக்காகக் காத்திருந்த இரு நோயாளிகளுக்கு புதிய வாழ்வுக்கான வாய்ப்பு கிடைத்துள்ளது.
வவுனியா வைத்தியசாலையில் முன்னெடுக்கப்பட்ட இந்த உறுப்பு தான நடவடிக்கை, மனிதநேயத்தின் முக்கியத்துவத்தை எடுத்துக்காட்டும் நிகழ்வாக அமைந்துள்ளது.
முல்லைத்தீவு, உடுப்புக்குளம் நான்காம் கட்டைப் பகுதியைச் சேர்ந்த சண்முகம் இந்திரா என்ற 53 வயதுடைய பெண்ணே இவ்வாறு மூளைச்சாவடைந்துள்ளார்.
கடந்த 15ஆம் திகதி, தனது மகனுடன் மோட்டார் சைக்கிளில் மாஞ்சோலைப் பகுதியில் பயணித்துக்கொண்டிருந்தபோது அவர் எதிர்பாராத விதமாகத் தவறி விழுந்து விபத்துக்குள்ளாகியுள்ளார். இந்த விபத்தில் தலையில் பலத்த காயமடைந்த அவர் சுயநினைவை இழந்த நிலையில், உடனடியாக அருகிலுள்ள வைத்தியசாலையில் அனுமதிக்கப்பட்டுள்ளார்.
பின்னர் மேலதிக சிகிச்சைகளுக்காக யாழ்ப்பாணம் போதனா வைத்தியசாலைக்கு மாற்றப்பட்டு தீவிர சிகிச்சைகள் வழங்கப்பட்டன. எனினும், அவரது உடல்நிலையில் முன்னேற்றம் ஏற்படாததையடுத்து, வவுனியா வைத்தியசாலைக்கு மாற்றப்பட்டுள்ளார்.
அங்கு அவர் மூளைச்சாவடைந்த நிலையில், குடும்பத்தினரின் சம்மதத்துடன் அவரது இரண்டு சிறுநீரகங்களையும் தானமாக வழங்குவதற்கு நடவடிக்கை எடுக்கப்பட்டது.
இதற்கமைய, வவுனியா வைத்தியசாலையில் மேற்கொள்ளப்பட்ட உறுப்பு தான நடவடிக்கையின் மூலம் பெறப்பட்ட இரண்டு சிறுநீரகங்களும், சிறுநீரக மாற்று அறுவைச் சிகிச்சை தேவைப்பட்ட இரு நோயாளிகளுக்குப் பொருத்தப்பட்டுள்ளதாகத் தெரிவிக்கப்படுகிறது.
தாயின் இழப்பால் குடும்பத்தினர் ஆழ்ந்த துயரத்தில் உள்ள போதிலும், அந்தத் துயரமான சூழலிலும் ஏனைய இருவரின் உயிரைக் காக்கும் வகையில் உறுப்புகளைத் தானமாக வழங்குவதற்கு குடும்பத்தினர் முன்வந்துள்ளமை பலரது கவனத்தையும் ஈர்த்துள்ளது.
இந்த விபத்து ஒரு குடும்பத்திற்கு ஈடுசெய்ய முடியாத இழப்பை ஏற்படுத்தியுள்ள நிலையில், உறுப்பு தானத்தின் மூலம் இரண்டு நோயாளிகளுக்கும் அவர்களது குடும்பங்களுக்கும் புதிய நம்பிக்கை கிடைத்துள்ளது.
