மலேசியாவின் சரவாக் மாநிலம், கூச்சிங் நகரிலுள்ள Tunku Putra-HELP சர்வதேசப் பாடசாலையில் பெண் ஆசிரியர் மீது கோடரியால் தாக்குதல் நடத்தியதாகக் கூறப்படும் 16 வயது மாணவர் கைது செய்யப்பட்டு, பின்னர் பொலிஸ் பிணையில் விடுவிக்கப்பட்டுள்ளார்.
கடந்த ஒக்டோபர் 21ஆம் திகதி புதன்கிழமை காலை சுமார் 8 மணியளவில் இடம்பெற்ற இச்சம்பவத்தில், ஆசிரியரின் கையில் வெட்டுக் காயங்கள் ஏற்பட்டுள்ளன. அவர் வைத்தியசாலையில் அனுமதிக்கப்பட்டதுடன், உயிருக்கு ஆபத்தான காயங்கள் ஏற்படவில்லை எனத் தெரிவிக்கப்பட்டுள்ளது.
சம்பவத்தின்போது மாணவர் தனது தலையில் கையடக்கத் தொலைபேசியைப் பொருத்தி, தாக்குதலை நேரலையாக ஒளிபரப்பியதாகக் கூறப்படும் காணொளி சமூக வலைத்தளங்களில் பரவியுள்ளது. பொலிஸார் மேற்கொண்ட சோதனையில் சிறிய கோடரி மற்றும் மடிக்கத்தி உள்ளிட்ட பொருட்கள் கைப்பற்றப்பட்டுள்ளன.
தாக்குதலுக்கான காரணம் இதுவரை உறுதிப்படுத்தப்படாத நிலையில், ஆயுதம் தொடர்பான சட்டங்களின் கீழ் பொலிஸார் விசாரணைகளை முன்னெடுத்து வருகின்றனர். இதனையடுத்து, பாடசாலையின் பாதுகாப்பு நடவடிக்கைகளும் பலப்படுத்தப்பட்டுள்ளன.
