தமிழ்நாட்டின் ராமநாதபுரம் மாவட்டம் பாம்பன் தெற்குவாடி கடற்கரைப் பகுதியில், சட்டவிரோதமாகப் படகு மூலம் தமிழகத்துக்குள் நுழைந்த இலங்கையர்கள் மூவர் கைது செய்யப்பட்டுள்ளனர்.
ராமேஸ்வரம் கியூ பிரிவு பொலிஸாரால் கைது செய்யப்பட்ட குறித்த மூவரிடமும் தற்போது தீவிர விசாரணைகள் முன்னெடுக்கப்பட்டு வருகின்றன.
விசாரணைகளின்படி, இலங்கையர்களைச் சட்டவிரோதமாகப் படகு மூலம் தமிழகத்துக்கு அழைத்துச் செல்வதற்காக 1.10 இலட்சம் இந்திய ரூபாய் பணம் பெறப்பட்டுள்ளதாகத் தெரியவந்துள்ளது.
மேலும், தமிழகத்துக்குள் சட்டவிரோதமாக நுழைந்த குறித்த இலங்கையர்கள், அங்கிருந்து டெல்லிக்குச் சென்று போலியான கடவுச்சீட்டைப் பெற்று, பின்னர் லண்டன் செல்லத் திட்டமிட்டிருந்ததாக ஆரம்பகட்ட விசாரணைகளில் தெரியவந்துள்ளதாகப் பொலிஸார் தெரிவித்துள்ளனர்.
இந்தச் சம்பவத்தின் பின்னணியில் வேறு நபர்கள் தொடர்புபட்டுள்ளனரா என்பது குறித்தும், சட்டவிரோதப் பயணத்துக்கு உதவியவர்கள் யார் என்பது தொடர்பிலும் பொலிஸார் மேலதிக விசாரணைகளை மேற்கொண்டு வருகின்றனர்.
