செம்மணி புதைகுழி தொடர்பான விசாரணையில் சமர்ப்பிக்கப்பட்ட இடைக்கால அறிக்கையில், ‘பெரும் புதைகுழி’ என்ற சொற்றொடர் திட்டமிட்டு நீக்கப்பட்டிருக்கலாம் எனச் சந்தேகம் வெளியிடப்பட்டுள்ளது. இது தொடர்பில் பாதிக்கப்பட்ட தரப்பினர் சார்பில் முன்னிலையாகும் சட்டத்தரணிகள் குழுவொன்று நீதிமன்றில் நகர்த்தல் பத்திரத்தைத் தாக்கல் செய்துள்ளது.
பேராசிரியர் ராஜ் சோமதேவா நீதிமன்றில் சமர்ப்பித்த இடைக்கால அறிக்கையில் குறித்த சொற்றொடர் இடம்பெறாமை தொடர்பில் சட்டத்தரணிகள் தமது கவலையை வெளிப்படுத்தியுள்ளனர். முன்னதாக அவர் சமர்ப்பித்த அறிக்கைகளில் அந்தச் சொற்றொடர் குறிப்பிடப்பட்டிருந்ததாகவும், தற்போதைய அறிக்கையில் அது விடுபட்டிருப்பது பல்வேறு கேள்விகளை எழுப்புவதாகவும் பத்திரத்தில் சுட்டிக்காட்டப்பட்டுள்ளது.
அத்துடன், செம்மணியில் மனித எச்சங்கள் கண்டறியப்பட்டுள்ள பகுதியை வழக்கமான அடக்க இடமாகக் கருதுவதற்கு அறிவியல் ரீதியான ஆதாரங்கள் உள்ளனவா என்பதைத் தெளிவுபடுத்த வேண்டும் எனவும் சட்டத்தரணிகள் கோரிக்கை விடுத்துள்ளனர்.
இதற்காக, குறித்த பகுதியின் மயானப் பதிவுகள், நிலப் பயன்பாட்டின் வரலாறு, தொடர்புடைய சட்ட ஏற்பாடுகள் மற்றும் நம்பகமான சான்றுகள் ஆகியவற்றை ஆராய வேண்டியதன் அவசியமும் வலியுறுத்தப்பட்டுள்ளது.
மேலும், மனித எச்சங்கள் கண்டறியப்பட்டுள்ள ஆழம், அவற்றின் பரவல், மண் அடுக்குகளில் அவை அமைந்துள்ள விதம் மற்றும் அவற்றின் நிலை போன்ற அம்சங்கள் தடயவியல் மற்றும் தொல்லியல் ஆய்வுகளில் முக்கியத்துவம் வாய்ந்தவை எனச் சுட்டிக்காட்டப்பட்டுள்ளது.
இந்த அறிவியல் அவதானிப்புகள் வழக்கமான அடக்கம் என்ற விளக்கத்துடன் பொருந்துகின்றனவா என்பதையும், அறிக்கையின் முடிவுகளுக்கு வருவதற்குப் பயன்படுத்தப்பட்ட அறிவியல் ஆய்வுகள் மற்றும் ஒப்பீட்டுச் சான்றுகள் எவை என்பதையும் தெளிவுபடுத்த வேண்டும் என சட்டத்தரணிகள் தமது நகர்த்தல் பத்திரத்தில் கோரியுள்ளனர்.
இந்நிலையில், செம்மணி புதைகுழி தொடர்பான அறிக்கையில் எழுப்பப்பட்டுள்ள கேள்விகள் மற்றும் முன்வைக்கப்பட்டுள்ள கோரிக்கைகள் தொடர்பில் நீதிமன்றத்தின் அடுத்தகட்ட நடவடிக்கைகள் முக்கியத்துவம் பெற்றுள்ளன.
