இலங்கையின் எரிபொருள் விநியோகத்தில் வெளிநாட்டு நிறுவனங்கள் கட்டுப்பாடுகளை விதித்துள்ளதால், எரிபொருள் விலையை அதிகரிப்பது குறித்து கவனம் செலுத்தப்பட்டுள்ளதாக இலங்கை பெற்றோலியக் கூட்டுத்தாபனத்தின் தலைவர் டி. ஜே. ராஜகருணா தெரிவித்துள்ளார்.
இலங்கை ஐஓசி (LIOC), சீனாவின் சினோபெக் (Sinopec) மற்றும் அமெரிக்காவின் ஆர்.எம். பார்க்கஸ் (RM Parks) ஆகிய வெளிநாட்டு நிறுவனங்களே தமது எரிபொருள் விநியோகத்தைக் கட்டுப்படுத்தியுள்ளதாக அவர் டெய்லி மிரர் நாளிதழுக்கு உறுதிப்படுத்தியுள்ளார்.
நாட்டின் மொத்த எரிபொருள் விநியோகத்தில் சுமார் 45 சதவீதத்தை இந்த வெளிநாட்டு நிறுவனங்கள் வழங்கி வந்ததாகவும், தற்போதைய சூழ்நிலையில் நாட்டின் டீசல் தேவையில் 80 சதவீதத்தைத் தமது நிரப்பு நிலையங்கள் ஊடாக விநியோகிக்க வேண்டிய நிலை இலங்கை பெற்றோலியக் கூட்டுத்தாபனத்திற்கு ஏற்பட்டுள்ளதாகவும் அவர் குறிப்பிட்டுள்ளார்.
எரிபொருள் நுகர்வைக் கட்டுப்படுத்த QR குறியீட்டு முறையை மீண்டும் கடுமையாக நடைமுறைப்படுத்துவது சாத்தியமற்றது எனத் தெரிவித்துள்ள அவர், அதற்கு அதிக நிர்வாகச் செலவுகள் ஏற்படும் என்பதால் எரிபொருள் விலையை அதிகரிப்பதே நடைமுறைச் சாத்தியமான தீர்வாகும் எனக் கூறியுள்ளார்.
உலகச் சந்தையில் கடந்த சில நாட்களாக டீசல் மற்றும் பெட்ரோல் விலைகள் அசாதாரணமாக உயர்ந்துள்ளதால், இலங்கை பெற்றோலியக் கூட்டுத்தாபனம் கடுமையான நிதி மற்றும் செயல்பாட்டு நெருக்கடிகளை எதிர்கொண்டுள்ளதாகவும் அவர் தெரிவித்துள்ளார்.
கடந்த செவ்வாய்க்கிழமை நிலவரப்படி, உலகச் சந்தையில் ஒரு பீப்பாய் டீசலின் விலை 174 அமெரிக்க டொலராகவும், ஒரு பீப்பாய் பெட்ரோலின் விலை 133 அமெரிக்க டொலராகவும் உயர்ந்துள்ளதாக கூட்டுத்தாபனத் தலைவர் சுட்டிக்காட்டியுள்ளார்.
