கிழக்கு பல்கலைக்கழக வளாகத்தில் சுகாதார நடைமுறைகளைப் பின்பற்றத் தவறிய 3 சிற்றுண்டிச்சாலைகளுக்கு ஏறாவூர் நீதிவான் நீதிமன்றம் மொத்தம் 1 இலட்சத்து 50 ஆயிரம் ரூபாய் அபராதம் விதித்துள்ளது. அவற்றில் 2 சிற்றுண்டிச்சாலைகளை 14 நாட்களுக்கு தற்காலிகமாக மூடவும் நீதிமன்றம் உத்தரவிட்டுள்ளது.
சுகாதார அதிகாரிகளால் பலமுறை எச்சரிக்கைகள் விடுக்கப்பட்டும், உரிய சுகாதார நடைமுறைகளைப் பேணத் தவறிய குறித்த சிற்றுண்டிச்சாலைகளுக்கு எதிராக செங்கலடி சுகாதார வைத்திய அதிகாரி அலுவலக பொதுச் சுகாதார பரிசோதகர்களால் 8 வழக்குகள் தாக்கல் செய்யப்பட்டன.
இந்த வழக்குகளை விசாரித்த நீதிவான், 3 சிற்றுண்டிச்சாலைகளுக்கும் அபராதம் விதித்ததுடன், சுகாதாரக் குறைபாடுகளை நிவர்த்தி செய்யும் வரை 2 சிற்றுண்டிச்சாலைகளை மூடி திருத்தப் பணிகளை மேற்கொள்ளுமாறும் உத்தரவிட்டார்.
இதேவேளை, நுளம்புகள் பெருகுவதற்கு ஏதுவாகச் சூழலைச் சுகாதாரமற்ற முறையில் வைத்திருந்த 5 பேருக்கு எதிராக வந்தாறுமூலை பொதுச் சுகாதார பரிசோதகரால் கடந்த ஒக்டோபர் 23ஆம் திகதி ஏறாவூர் நீதிவான் நீதிமன்றில் வழக்குகள் தாக்கல் செய்யப்பட்டன.
வழக்குகளை விசாரித்த நீதிமன்றம், குற்றவாளிகளாக அடையாளம் காணப்பட்ட 5 பேருக்கும் தலா 10,000 ரூபாய் வீதம் மொத்தம் 50,000 ரூபாய் அபராதம் விதிக்க உத்தரவிட்டது.
உணவக உரிமையாளர்கள் சுகாதார விதிமுறைகளை முறையாகப் பின்பற்றுவதுடன், பொதுமக்களும் தமது சுற்றுச்சூழலைத் தூய்மையாகப் பேண வேண்டும் என சுகாதாரப் பரிசோதகர்கள் வலியுறுத்தியுள்ளனர்.
