மட்டக்களப்பு மாவட்டத்தின் மயிலத்தமடு–மாதவனை மேய்ச்சல் தரைப் பகுதிகளில் மேய்ச்சலுக்கு விடப்படும் கால்நடைகள் தொடர்ச்சியாகச் சுட்டுக் கொல்லப்பட்டு, இறைச்சிக்காக எடுத்துச் செல்லப்படுவதாகப் பண்ணையாளர்கள் குற்றஞ்சாட்டியுள்ளனர்.
தமது கால்நடைகளையும் வாழ்வாதாரத்தையும் பாதுகாக்க வேண்டிய அரசாங்கமும் சம்பந்தப்பட்ட அதிகாரிகளும் உரிய நடவடிக்கை எடுக்கத் தவறியுள்ளதாகவும் அவர்கள் கவலை தெரிவித்துள்ளனர்.
கடந்த ஒக்டோபர் 22ஆம் திகதி இரவு, ரஞ்சன் என்பவருக்குச் சொந்தமான மாடு ஒன்று கொல்லப்பட்டு, இறைச்சிக்காக எடுத்துச் செல்லப்பட்டுள்ளதாகத் தெரிவிக்கப்படுகிறது. குறித்த மாட்டைத் தேடிப் பொலிஸாரின் உதவியுடன் சென்றபோது, அதன் எச்சங்கள் மட்டுமே கண்டெடுக்கப்பட்டதாகப் பாதிக்கப்பட்ட பண்ணையாளர் தெரிவித்துள்ளார்.
மயிலத்தமடு–மாதவனை மேய்ச்சல் தரைப் பிரச்சினைக்குத் தீர்வு பெற்றுத்தருவதாக அதிகாரிகள் உறுதியளித்திருந்த போதிலும், தமது கால்நடைகளின் பாதுகாப்பு தொடர்ந்து கேள்விக்குறியாகவே இருப்பதாகப் பண்ணையாளர்கள் தெரிவித்துள்ளனர்.
கால்நடைகளைச் சில காலம் காடுகளுக்குள் கொண்டு சென்று மேய்க்குமாறும், சில மாதங்களுக்குள் மேய்ச்சல் தரைப் பிரச்சினைக்குத் தீர்வு பெற்றுத்தருவதாகவும் மட்டக்களப்பு மாவட்ட அரசாங்க அதிபரும் தேசிய மக்கள் சக்தி அரசாங்கத்தின் அமைச்சின் இணைப்பாளர் திலகநாதனும் தெரிவித்திருந்ததாக அவர்கள் குறிப்பிட்டுள்ளனர்.
எனினும், காடுகளுக்குள் கொண்டு செல்லப்பட்ட கால்நடைகள்கூடச் சுட்டுக் கொல்லப்பட்டு இறைச்சிக்காக எடுத்துச் செல்லப்படுவதாகவும், இச்சம்பவங்களைத் தடுத்து நிறுத்த அதிகாரிகள் உரிய நடவடிக்கை எடுக்கவில்லை என்றும் பண்ணையாளர்கள் குற்றஞ்சாட்டியுள்ளனர்.
மேய்ச்சல் தரைப் பிரச்சினைக்குத் தீர்வு காணப்பட்டுவிட்டதாக அரசாங்கத் தரப்பில் தெரிவிக்கப்படும் நிலையில், நடைமுறையில் தமது பிரச்சினைகள் இன்னும் தீர்க்கப்படவில்லை எனப் பண்ணையாளர்கள் சுட்டிக்காட்டியுள்ளனர்.
நீதிமன்றத் தீர்ப்பின் மூலம் வெளியேற்றப்பட்டதாகக் கூறப்படும் விவசாயிகள், மகாவலி அதிகார சபையின் ஊடாக மீண்டும் குடியேற்றப்பட்டுள்ளதாகவும் அவர்கள் குற்றஞ்சாட்டுகின்றனர்.
அத்துடன், தம்மையும் தமது கால்நடைகளையும் மேய்ச்சல் தரைப் பகுதிகளிலிருந்து வெளியேறுமாறு அச்சுறுத்தல்கள் விடுக்கப்படுவதாகவும், மறுபுறம் தமது கால்நடைகள் கொல்லப்பட்டு இறைச்சிக்காக எடுத்துச் செல்லப்படுவதாகவும் பண்ணையாளர்கள் தெரிவித்துள்ளனர்.
தமது கால்நடைகளைப் பாதுகாத்து, வாழ்வாதாரத்தை உறுதிப்படுத்துவதற்குத் தேவையான நடவடிக்கைகளை அரசாங்கம் முன்னெடுக்க வேண்டும் எனப் பண்ணையாளர்கள் வலியுறுத்தியுள்ளனர்.
கால்நடைகளைக் கொல்பவர்களுக்கு எதிராக உரிய சட்ட நடவடிக்கை எடுக்கப்படுவதுடன், மயிலத்தமடு–மாதவனை மேய்ச்சல் தரைப் பிரச்சினைக்கு நிரந்தரத் தீர்வு வழங்கப்பட வேண்டும் என்றும் அவர்கள் கோரிக்கை விடுத்துள்ளனர்.
இவ்விடயத்தில் அதிகாரிகள் தொடர்ந்து தாமதம் காட்டுவதால் தமது வாழ்வாதாரம் பாதிக்கப்படுவதாகத் தெரிவித்துள்ள பண்ணையாளர்கள், தமது கால்நடைகளின் பாதுகாப்பை உறுதிப்படுத்த சம்பந்தப்பட்ட தரப்பினர் உடனடியாகத் தலையிட வேண்டும் எனக் கோரியுள்ளனர்.
