மட்டக்களப்பு தலைமையக பொலிஸ் பிரிவுக்குட்பட்ட அம்புறோஸ் வீதியில் வீடொன்றை உடைத்து கையடக்கத் தொலைபேசி மற்றும் பணம் திருடப்பட்ட சம்பவம் தொடர்பில் நான்கு பேர் கைது செய்யப்பட்டுள்ளனர்.
கடந்த 2024ஆம் ஆண்டு ஏப்ரல் 24ஆம் திகதி, குறித்த பகுதியில் பூட்டியிருந்த வீடொன்றை உடைத்து சுமார் 40,000 ரூபா பெறுமதியான கையடக்கத் தொலைபேசியும் 5,500 ரூபா பணமும் திருடப்பட்டுள்ளதாக பொலிஸில் முறைப்பாடு செய்யப்பட்டது.
இது தொடர்பில் விசாரணைகளை முன்னெடுத்த பொலிஸார், திருடப்பட்ட கையடக்கத் தொலைபேசி தொடர்பான தகவல்களை இலங்கை தொலைத்தொடர்பு ஒழுங்குபடுத்தல் ஆணைக்குழுவிடம் வழங்கியுள்ளனர்.
ஆணைக்குழுவின் விசாரணைகளின் அடிப்படையில், குறித்த தொலைபேசியைப் பயன்படுத்தி வந்த நபர் தொடர்பான தகவல்கள் பொலிஸாருக்கு கிடைத்துள்ளன.
இதனையடுத்து, மட்டக்களப்பு தலைமையகப் பொலிஸாரின் பெரும் குற்றத்தடுப்புப் பிரிவினர் மேற்கொண்ட விசாரணைகளில், குறித்த தொலைபேசியைப் பயன்படுத்தி வந்த நபர் மட்டக்களப்பு நகரில் வைத்து கைது செய்யப்பட்டுள்ளார்.
அவரிடம் மேற்கொள்ளப்பட்ட விசாரணைகளில், காத்தான்குடியிலுள்ள கையடக்கத் தொலைபேசி விற்பனை நிலையமொன்றில் பணம் கொடுத்து அதனை வாங்கியுள்ளதாகத் தெரியவந்துள்ளது.
இதனைத் தொடர்ந்து, தொலைபேசியை விற்பனை செய்த கடை உரிமையாளர் உள்ளிட்ட மேலும் மூவரும் கைது செய்யப்பட்டுள்ளனர்.
கைது செய்யப்பட்ட நால்வரும் 24, 38, 45 மற்றும் 50 வயதுடையவர்கள் எனவும், மட்டக்களப்பு நகர் மற்றும் காத்தான்குடி பகுதிகளைச் சேர்ந்தவர்கள் எனவும் பொலிஸார் தெரிவித்தனர்.
சந்தேகநபர்களை விசாரணைகளின் பின்னர் நீதிமன்றில் ஆஜர்படுத்த நடவடிக்கை எடுக்கப்பட்டுள்ளதாகவும், சம்பவம் தொடர்பான மேலதிக விசாரணைகளை மட்டக்களப்பு தலைமையகப் பொலிஸார் முன்னெடுத்து வருவதாகவும் தெரிவிக்கப்பட்டுள்ளது.
