மறைந்த முன்னாள் நாடாளுமன்ற உறுப்பினரும், வல்வெட்டித்துறை நகரசபையின் முன்னாள் தலைவருமான எம்.கே. சிவாஜிலிங்கத்தின் இறுதிக்கிரியைகள் இன்று (16) வல்வெட்டித்துறையில் நடைபெற்றுள்ளன.
அன்னாரின் இல்லத்தில் இன்று காலை இறுதிக்கிரியைகள் இடம்பெற்றதைத் தொடர்ந்து, நண்பகல் 12 மணியளவில் வல்வெட்டித்துறை சந்தியில் பூதவுடல் பொதுமக்களின் அஞ்சலிக்காக வைக்கப்பட்டது.

இதன்போது அரசியல் பிரமுகர்கள், பொதுமக்கள் மற்றும் பல்வேறு தரப்பினரும் கலந்துகொண்டு தமது இறுதி அஞ்சலியைச் செலுத்தினர்.
பின்னர், அன்னாரின் பூதவுடல் வல்வெட்டித்துறை ஊறணி இந்து மயானத்திற்கு எடுத்துச் செல்லப்பட்டு தகனம் செய்யப்பட்டது.
69 வயதான எம்.கே. சிவாஜிலிங்கம் கடந்த நவம்பர் 14ஆம் திகதி நீண்டகால உடல்நலக் குறைவினால் காலமானார்.
2001 மற்றும் 2004ஆம் ஆண்டுகளில் நாடாளுமன்ற உறுப்பினராகத் தெரிவு செய்யப்பட்ட அவர், வடக்கு மாகாண சபை உறுப்பினராகவும் வல்வெட்டித்துறை நகரசபைத் தலைவராகவும் பணியாற்றியுள்ளார்.
அவரது மறைவு தமிழ் தேசிய அரசியல் வட்டாரத்திலும், அவரது சொந்த ஊரான வல்வெட்டித்துறை மக்களிடையேயும் பெரும் சோகத்தை ஏற்படுத்தியுள்ளதுடன் அரசியல் தலைவர்கள் மட்டுமல்லாமல் சமூக ஆர்வலர்களும் தமது இரங்கலை வௌியிட்டு வருகின்றமை குறிப்பிடத்தக்கது.












