மட்டக்களப்பு, போரதீவுப்பற்று பிரதேசத்தில் காட்டு யானையின் தாக்குதலுக்கு இலக்காகி படுகாயமடைந்த 59 வயதுடைய பெண் ஒருவர், ஒன்பது நாட்கள் வைத்தியசாலையில் சிகிச்சை பெற்று வந்த நிலையில் உயிரிழந்துள்ளார்.
போரதீவுப்பற்று பிரதேச செயலாளர் பிரிவின் 35ஆம் கிராமமான கண்ணபுரம் கிழக்கு கிராம உத்தியோகத்தர் பிரிவைச் சேர்ந்த காத்திகேசு இராசலெட்சுமி என்பவரே இவ்வாறு உயிரிழந்துள்ளார்.
கடந்த 05.11.2026ஆம் திகதி மாலை சுமார் 5.30 மணியளவில், குறித்த பெண் தனது கணவருடன் மாடுகளைப் பார்ப்பதற்காகச் சென்றிருந்தபோது, அப்பகுதிக்கு வந்த காட்டு யானை இருவரையும் துரத்தியுள்ளது.
இதன்போது, குறித்த பெண்ணைத் தாக்கிய யானை அவரைப் பற்றைக்காட்டுக்குள் தூக்கி வீசிவிட்டுச் சென்றுள்ளது.
யானையிடமிருந்து தப்பிய கணவர், பின்னர் மனைவியைத் தேடிச் சென்றபோது பற்றைக்காட்டுக்குள் இருந்து அவரது சத்தத்தைக் கேட்டுள்ளார்.
இதனையடுத்து, கிராம மக்களின் உதவியுடன் அவர் உடனடியாக களுவாஞ்சிகுடி வைத்தியசாலையில் அனுமதிக்கப்பட்டு, மேலதிக சிகிச்சைக்காக மட்டக்களப்பு போதனா வைத்தியசாலைக்கு மாற்றப்பட்டார்.
இந்நிலையில், ஒன்பது நாட்களாக சிகிச்சை பெற்று வந்த அவர், நேற்று (13) காலை சிகிச்சை பலனின்றி உயிரிழந்துள்ளார்.
இந்தச் சம்பவம் அப்பகுதி மக்கள் மத்தியில் பெரும் சோகத்தை ஏற்படுத்தியுள்ளது.
போரதீவுப்பற்று பிரதேசத்தில் தொடர்ச்சியாக இடம்பெற்று வரும் காட்டு யானைகளின் அச்சுறுத்தலால் பொதுமக்களின் உயிர்களுக்கும் உடைமைகளுக்கும் பெரும் ஆபத்து ஏற்பட்டுள்ளதாகப் பிரதேச மக்கள் கவலை தெரிவிக்கின்றனர்.
ஒவ்வொரு ஆண்டும் யானைகளின் தாக்குதல்களால் உயிரிழப்புகளும் சொத்துச் சேதங்களும் ஏற்பட்டு வருகின்ற போதிலும், இதுவரை நிரந்தரத் தீர்வு எட்டப்படவில்லை எனவும் அவர்கள் சுட்டிக்காட்டுகின்றனர்.
எனவே, சம்பந்தப்பட்ட அதிகாரிகள் இனியும் காலதாமதம் செய்யாமல் யானைகளின் அச்சுறுத்தல் அதிகமுள்ள கிராமப் பகுதிகளில் நிரந்தர யானை வேலிகளை அமைத்து, பொதுமக்களின் உயிர்களையும் வாழ்வாதாரத்தையும் பாதுகாக்க உடனடி நடவடிக்கை எடுக்க வேண்டும் எனப் பிரதேச மக்கள் கோரிக்கை விடுத்துள்ளனர்.
