களுவாஞ்சிகுடி நீதிவான் நீதிமன்றத்தின் முன்னாள் நீதிபதி ரஞ்சித்குமார், விளக்கமறியலில் இருந்து பிணையில் செல்ல மட்டக்களப்பு மேல் நீதிமன்றம் நேற்று (13) அனுமதி வழங்கியுள்ளது.
களுவாஞ்சிகுடி நீதிமன்றத்தின் களஞ்சிய அறையில் இடம்பெற்றதாகக் கூறப்படும் நிதிக் கையாடல் சம்பவம் தொடர்பில் முன்னாள் நீதிபதி ரஞ்சித்குமார் மீது வழக்குத் தாக்கல் செய்யப்பட்டிருந்தது.
இந்த வழக்கில் கடந்த ஏப்ரல் மாதம் நீதிமன்றத்தில் ஆஜர்படுத்தப்பட்ட அவர், விளக்கமறியலில் வைக்கப்பட்டார்.
இதனையடுத்து, களுவாஞ்சிகுடி நீதிவான் நீதிமன்றத்தில் பிணை கோரி அவர் விண்ணப்பித்திருந்த போதிலும், குறித்த விண்ணப்பம் நிராகரிக்கப்பட்டது.
இந்த உத்தரவுக்கு எதிராக மட்டக்களப்பு மேல் நீதிமன்றத்தில் மீளாய்வு மனு தாக்கல் செய்யப்பட்டிருந்தது.
குறித்த மனுவை விசாரணைக்கு எடுத்துக்கொண்ட மட்டக்களப்பு மேல் நீதிமன்ற நீதிபதி பிரபாகரன், முன்னாள் நீதிபதி ரஞ்சித்குமாரை தலா ஐந்து இலட்சம் ரூபா பெறுமதியான மூன்று சரீரப் பிணைகளில் விடுவிக்க உத்தரவிட்டார்.
முன்னாள் நீதிபதி சார்பில் சட்டத்தரணி ஜெகனின் அறிவுறுத்தலுக்கு அமைவாக சிரேஷ்ட சட்டத்தரணி பே. பிரேம்நாத் நீதிமன்றத்தில் ஆஜராகியிருந்தார்.
களுவாஞ்சிகுடி நீதிமன்றத்தின் களஞ்சிய அறையில் இடம்பெற்றதாகக் கூறப்படும் கையாடல் சம்பவம் தொடர்பில் பொதுச் சொத்துகள் மீதான குற்றங்கள் தொடர்பான சட்டத்தின் கீழ் முன்னாள் நீதிபதிக்கு எதிராக வழக்குத் தாக்கல் செய்யப்பட்டுள்ளமை குறிப்பிடத்தக்கது.
