இலங்கையின் கடன் மறுசீரமைப்பு வேலைத்திட்டம் ஏனைய நாடுகளில் முன்னெடுக்கப்படும் வேலைத்திட்டங்களுடன் ஒப்பிடுகையில் மிக வேகமாக நடைபெற்று வருவதாக இந்திய நிதியமைச்சர் நிர்மலா சீதாராமன் தெரிவித்துள்ளார்.
சர்வதேச நாணய நிதியம் மற்றும் உலக வங்கியின் வருடாந்த மாநாட்டை முன்னிட்டு மொரோக்கோவின் மராகேஷில் நடைபெற்ற ஊடகவியலாளர் சந்திப்பில் கலந்து கொண்டு உரையாற்றும் போதே அவர் மேற்கண்டவாறு தெரிவித்தார்.
மேலும் கருத்து தெரிவித்த இந்திய நிதியமைச்சர்,
“இலங்கை சிரமங்களை எதிர்கொண்ட போது, அது ஒரு நடுத்தர வருமானம் கொண்ட நாடாக இருந்தது. ஆனால் கொவிட் தாக்கம் மற்றும் அதனால் ஏற்பட்ட ஸ்திரமின்மை காரணமாக அந்த நிலை வீழ்ச்சியடைந்தது. இலங்கை குறைந்த வருமானம் கொண்ட நாடாக மாறியது. இலங்கை எதிர்கொண்ட நெருக்கடி காரணமாக, நடுத்தர வருமானம் கொண்ட நாடாக இருந்த இது, ஒரு பொதுவான கட்டமைப்பிற்குள் தீர்க்க முடியாத ஒரு சூழ்நிலையாகும். அதனால்தான் இந்த நெருக்கடியை பொதுவான கட்டமைப்பில் எதிர்கொள்ள அது தகுதி பெறவில்லை.”
“பலருடன் ஒப்பிடுகையில், சர்வதேச நாணய நிதியத்தின் மூலம் இலங்கை பெறும் தீர்வுகள் மிகவும் நல்லவை மற்றும் மிக விரைவானவை என்று நான் நினைக்கிறேன். மற்றவர்களுக்கு எதிரான பொதுவான கட்டமைப்பை நான் மதிப்பிடவில்லை. ஆனால் பொதுவாக இன்று IMF மற்றும் பல நிறுவனங்களில், செயல்முறை வேகமாக இருக்க வேண்டும்.இலங்கையில் முன்மொழிவுகள் வேகமாக நடப்பதாக கூறப்படுகிறது.
“சர்வதேச நாணய நிதியம் மற்றும் உலக வங்கியுடன், இறையாண்மைக் கடன் தொடர்பான கடன் வழங்குநர் குழுக்களை நிறுவும் போது இலங்கையின் கடன் நெருக்கடி பிரச்சினை பற்றி நாங்கள் விவாதித்தோம். அந்த நிலைமை எதிர்காலத்தில் எந்த நாட்டிற்கும் பயன்படும் வகையில் அவதானம் செலுத்தப்பட வேண்டும். அந்த முறைமை ஊடாக மிக துரிதமாக தீர்வுகளை வழங்கி செயல்படுத்த முடியும் என்று நினைக்கிறேன்.” என்றார்.
இதேவேளை, சர்வதேச நாணய நிதியத்தின் வேலைத்திட்டத்தின் கட்டமைப்பிற்குள் கடன் தீர்வுகள் தொடர்பில் கொள்கையளவில் உடன்பாட்டை எட்டுவதற்கு தாங்கள் செயற்பட்டு வருவதாக இலங்கையின் தனியார் கடன் வழங்குநர்கள் தெரிவிக்கின்றனர்.
இலங்கையின் சர்வதேச பத்திரக் கடன் தொடர்பான இலங்கையின் கடன் சவால்களுக்கு நிலையான தீர்வைக் காண்பதற்கு, துரிதமாக செயற்படுவதற்கு தாங்கள் அர்ப்பணிப்புடன் இருப்பதாக அவர்கள் மேலும் சுட்டிக்காட்டியுள்ளனர்.
