இந்திய தெலுங்கானா மாநில சட்டப்பேரவை தேர்தலில் பாரதிய ராஷ்ட்ரிய சமிதி கட்சி தோல்வியை தழுவியுள்ளது. இந்த நிலையில், சந்திரசேகர் ராவ் முதல்வர் பதவியை இராஜினாமா செய்துள்ளார். அவரது இராஜினாமாவை அம் மாநில ஆளுநர் தமிழிசை ஏற்றுக் கொண்டுள்ளார்.
தெலுங்கானா மாநிலத்தில் உள்ள 119 சட்டப்பேரவை தொகுதிகளுக்கும் கடந்த 30 ஆம் திகதி ஒரே கட்டமாக
வாக்குப்பதிவு நடைபெற்றது. ஆளும் கட்சியாக உள்ள பி.ஆர்.எஸ், காங்கிரஸ் மற்றும் பா.ஜ.க. ஆகிய கட்சிகள் தேர்தல் களத்தில் போட்டியிட்டன.
இதில் மக்களின் ஆதரவை காங்கிரஸ் பெற்று, ஆட்சி அமைக்க உள்ளது. இந்த நிலையில், தனது முதல்வர் பதவியை இராஜினாமா செய்துள்ளார் சந்திரசேகர்ராவ். இது குறித்து அம்மாநில ஆளுநர் அலுவலகம் தெரிவிகையில்,தனது முதல்வர் பதவியை இராஜினாமா செய்வதாக சந்திரசேகர்ராவ், ஆளுநருக்கு கடிதம் மூலம் தெரிவித்திருந்தார். அவரது இராஜினாமாவை ஆளுநர் ஏற்றுக் கொண்டார். அதோடு புதிய அரசு ஆட்சி அமைக்கும் வரையில் பதவியில் தொடரும் படி அவரிடம் ஆளுநர் கேட்டுக் கொண்டார் என்று தெரிவிக்கப்பட்டுள்ளது.
கடந்த 2014 இல் உதயமான தெலுங கானா மாநிலத்தில் 2014 மற்றும் 2018 இல் நடைபெற்ற சட்டப்பேரவை தேர்தலில் பாரதிய ராஷ்ட்ரிய சமிதி கட்சி ஆட்சியை பிடித்தது. அதன் காரணமாக பி.ஆர்.எஸ். கட்சியின் தலைவரான சந்திரசேகர் ராவ், முதல்வராக பொறுப்பேற்று ஆட்சி நடத்தினார். இருந்தும் 2023 சட்டப்பேரவை தேர்தலில் தோல்வியை தழுவியுள்ளார் என்பது குறிப்பிடத்தக்கது.
