மட்டக்களப்பில் 1.147 கிராம் ஹெரோயின் போதைப்பொருளைத் தன்வசம் வைத்திருந்த வாழைச்சேனையைச் சேர்ந்த 29 வயதுடைய முகமது றிஸ்வி என்பவருக்கு 7 ஆண்டுகள் கடூழிய சிறைத்தண்டனை விதித்து மட்டக்களப்பு மேல் நீதிமன்ற நீதிபதி ரி.ஜே. பிரபாகரன் இன்று (29) தீர்ப்பளித்தார்.
மேலும், ஒரு இலட்சம் ரூபா அபராதம் விதிக்கப்பட்டதுடன், அதனைச் செலுத்தத் தவறினால் இரண்டு ஆண்டுகள் சிறைத்தண்டனை அனுபவிக்க வேண்டும் என்றும் உத்தரவிடப்பட்டது.
கடந்த 2020ஆம் ஆண்டு ஹெரோயின் போதைப்பொருளுடன் கைது செய்யப்பட்ட குறித்த நபருக்கு எதிரான வழக்கு, 2022ஆம் ஆண்டு மட்டக்களப்பு மேல் நீதிமன்றத்திற்கு மாற்றப்பட்டு விசாரணை இடம்பெற்று வந்தது.
கடந்த ஒக்டோபர் 14ஆம் திகதி அவர் குற்றவாளியாக அடையாளம் காணப்பட்ட நிலையில், ஹெரோயின் விற்பனை செய்த குற்றச்சாட்டிலிருந்து அவரை விடுவித்து, போதைப்பொருளைத் தன்வசம் வைத்திருந்த குற்றத்திற்குத் தண்டனை விதித்து நீதிமன்றம் இன்று உத்தரவிட்டது.
