கிழக்கு மாகாணத்தில் தொடரும் கனமழை காரணமாக மாவட்ட அனர்த்த முகாமைத்துவ நிலையம் மற்றும் திருக்கோவில் பிரதேச செயலகம் பொதுமக்களுக்கு அவசர எச்சரிக்கை ஒன்றை விடுத்துள்ளது.
இது தொடர்பில் தெரிவிக்கப்படுவதாவது,
அம்பாறை மாவட்ட பிரதி மாகாண நீர்ப்பாசன பொறியியலாளர் மற்றும் தம்பிலுவில் நீர்ப்பாசன பொறியியலாளர் மற்றும் தம்பிலுவில் கமநல அபிவிருத்தி உத்தியோகத்தர் ஆகியோரின் தகவலுக்கமைய திருக்கோவில் பிரதேசத்திற்குட்பட்ட பெரியதலாவை குளத்தின் நீர்மட்டம் உயர்வடைந்து மிக வேகமாக மேலதிக நீர் வெளியேறக் கூடிய சாத்திய நிலை உள்ளதால் அவ் நீரானது சாகாம குளத்தினூடாக வெளியேற்றம் பெறும் பட்சத்தில் மேலதிக நீர் தம்பட்டை, முனையூர், தம்பிலுவில் ,மற்றும் திருக்கோவில் ஆகிய கிராம சேவகர் பிரிவுகளுக்குள் உட்புகுவதற்கான சாத்தியக்கூறுகள் இருப்பதால் இக் கிராம சேவகர் பிரிவு மக்கள் அவதானத்துடன் இருக்குமாறு கேட்டுக்கொள்ளப்படுகின்றீர்கள்.
அதேசமயம் தொடரும் மழையினால் சேனநாயக்க சமுத்திரத்தின் கொள்ளளவு இன்று பிற்பகல் 1.00 மணி நிலவரப்படி 750,000 acft ஐ எட்டியுள்ளது. தற்போது நிலவும் மழை நிலைமையின் படி, அடுத்த சில மணித்தியாலங்களுக்குள் இது முழு விநியோக அளவை எட்டும் என எதிர்பார்க்கப்படுகிறது. எனவே, பொதுமக்கள் மற்றும் கல் ஓயாவின் கீழ்பகுதிகளில் இயங்கும் வாகன சாரதிகள் வெள்ளத்தினால் ஏற்படக்கூடிய பாதிப்புகளை குறைப்பதற்கு போதிய முன்னெச்சரிக்கை நடவடிக்கைகளை எடுக்குமாறு அன்புடன் கேட்டுக் கொள்ளப்படுகிறார்கள். குறிப்பாக பொல்வத்தை, பழலந்த, இறக்காமம், அக்கரைப்பற்று, அட்டாளைச்சேனை, ஆலையடிவேம்பு, சம்மாந்துறை, காரைதீவு, நிந்தவூர், சாய்ந்தமருது, கல்முனை மற்றும் ஒலிவில் தென்கிழக்கு பல்கலைக்கழகப் பிரதேசத்தின் தாழ்வான பிரதேசங்களை அண்மித்த மக்கள் அவதானமாக இருக்க வேண்டும் என அம்பாறை மாவட்ட செயலகம் தெரிவித்துள்ளது.
