மட்டக்களப்பு மாவட்டத்தில் கடந்த 2023 ஜனவரி மாதத்திலிருந்து டிசெம்பர் மாதம் வரையான காலப்பகுதியில் 1200 இற்கும் அதிகமான வர்த்தக நிலையங்கள் சுற்றிவளைக்கப்பட்டன என்று பாவனையாளர் அலுவல்கள் அதிகாரசபையின் மட்டக்களப்பு மாவட்ட பொறுப்பதிகாரி என். முஹம்
மத் சப்றாஸ் தெரிவித்தார்.
இவற்றில் 920 வர்த்தக நிலையங்களுக்கு எதிராக பாவனையாளர் அலுவல்கள் அதிகாரசபையினால் மட்டக்களப்பு, ஏறாவூர், களுவாஞ்சிகுடி, வாழைச்சேனை, வாகரை ஆகிய நீதிவான் நீதிமன்றங்களில் வழங்குத் தாக்கல் செய்யப்பட்டுள்ளன.
இந்த சுற்றி வளைப்புகளின் மூலம் ஒரு கோடியே 24 இலட்சத்து 54 ஆயிரத்து 50 ரூபாய் அபராதம் அறவிறப்பட்டுள்ளதாக மாவட்ட பாவனையாளர் அலுவல்கள் அதிகாரசபை அலுவலகம் குறிப்பிட்டுள்ளது.
கட்டுப்பாட்டு விலையை விட அதிக விலை நிர்ணயம், விலையை காட்சிப்படுத்தாமை, காலாவதியான பொருட்களை விற்பனை செய்தமை – காட்சிப்படுத்தியமை, அத்தியவசியப் பொருட்களை விற்பனை செய்யாது மறுத்தமை மற்றும் பதுக்கியமை, மின் மற்றும் இலத்திரனியல் சாதனப் பொருட்களுக்கு கட்டுறுத்து காலம் (warranty ) வழங்காமை, பொருட்களை விற்பனை செய்யும் போது
முறையான பற்றுச்சீட்டு விநியோகிக்காமை, பொருட்களின் முறையான விபரணமின்றி (Label) விற்பனை செய்தமை போன்ற காரணங்கள் இச்சுற்றி வளைப்புககளின் போது அதிகாரசபையினால் கண்டறியப்பட்டன – என்றும் தெரிவிக்கப்பட்டது.
