தென்கிழக்கு வங்காள விரிகுடாவில் நிலைகொண்டுள்ள அக்வான் (Akvan) சூறாவளி மேலும் தீவிரமடையக்கூடும் என வளிமண்டலவியல் திணைக்களம் எச்சரிக்கை விடுத்துள்ளது.
இந்த சூறாவளி இன்று (18) அதிகாலை திருகோணமலையிலிருந்து வடகிழக்கே சுமார் 650 கிலோமீற்றர் தொலைவில் மையம் கொண்டிருந்தது.
இது வடமேற்கு திசையில் நகர்ந்து நாளை (19) வலுவான புயலாகவும், நாளை மறுதினம் (20) இந்தியாவின் ஆந்திரப் பிரதேசம் மற்றும் யானம் கடற்கரை ஊடாகக் கரையைக் கடக்கவும் வாய்ப்புள்ளதாக எதிர்வுகூறப்பட்டுள்ளது.
இதனால், காங்கேசன்துறையிலிருந்து திருகோணமலை, மட்டக்களப்பு ஊடாக பொத்துவில் வரையிலான கடற்பகுதிகளில் மறு அறிவித்தல் வரை கடற்றொழில் மற்றும் கடல்சார் நடவடிக்கைகளில் ஈடுபட வேண்டாம் என அறிவுறுத்தப்பட்டுள்ளது.
குறித்த கடற்பகுதிகளில் காற்றின் வேகம் மணிக்கு 60 கிலோமீற்றர் வரை அதிகரிக்கக்கூடும் என்பதுடன், கடல் கொந்தளிப்பாகவும் காணப்படலாம்.
மேலும், ஊவா, தென் மாகாணங்கள் மற்றும் அம்பாறை மாவட்டத்தின் சில இடங்களில் மாலை அல்லது இரவு வேளைகளில் இடியுடன் கூடிய மழை பெய்யக்கூடும்.
நாட்டின் ஏனைய பகுதிகளில் பெரும்பாலும் வறண்ட வானிலை நிலவும் என வளிமண்டலவியல் திணைக்களம் தெரிவித்துள்ளது.
கடற்றொழிலாளர்கள் மற்றும் கடல்சார் சமூகத்தினர் பாதுகாப்பு அறிவுறுத்தல்களைப் பின்பற்றி அவதானத்துடன் செயற்படுமாறும் கேட்டுக்கொள்ளப்பட்டுள்ளனர்.







